Dağlıq Qarabağdakı sülhməramlı qüvvələrin komandiri general Rüstəm Muradovun iştirakı ilə keçirilən danışıqlar başa çatıb.

Reyting.az “Armenian News”a istinadla xəbər verir ki, ilkin məlumata görə, Azərbaycan hərbçiləri Ermənistanla sərhədin mübahisəli ərazisindən geri çəkilməlidir.

Bunu Syunik bölgəsinin Verin Akner kəndinin bələdiyyə sədri Spartak Minasyan bildirib.

“İlkin məlumata görə, Azərbaycan hərbçiləri ərazidən ayrılmalı, gərginlik azalmalı, sonra mövqe tutmalıdırlar. Ancaq mövqelər yaşayış məntəqələrimizə yaxınlaşmayacaq”.

“Danışıqların nəticələri bizim üçün müsbətdir və sabah Azərbaycan Silahlı Qüvvələri Sev Liç ərazisini (Qara göl) tərk etməlidir. Bu barədə öz “Facebook” səhifəsində deputat Zohrabyan məlumat verib.

“Azərbaycanlılarla beş günlük danışıqlar yenicə başa çatıb. Syunikdən mənə bildirildiyi kimi, danışıqların nəticəsi bizim üçün müsbətdir və sabah Azərbaycan silahlı qüvvələri Sev Liç ərazisini tərk etməlidir.

Ümid edək ki, sabah Azərbaycan Silahlı Qüvvələri həqiqətən Sev Liç ərazisini tərk edəcək və ən əsası bu, Ermənistanın başqa bir ərazisinin suverenliyi hesabına olmayacaq. Məsələn, Tiqranaşen (Kərk)”, – deyə Zohrabyan yazıb.

“Ortaq postların yaradılması ilə bağlı bir razılığın əldə edildiyi, başqa sözlə, türklərin istədiklərinə nail olduqları barədə məlumatlar var”. Bu barədə Ermənistanın keçmiş Baş naziri Hrant Baqratyan öz “Facebook” səhifəsində yazıb.

“Syunikdəki problemin həll olunduğu barədə mediaya məlumat verildi. Ancaq ortaq bir post yaratmağa razı olduqları barədə məlumatımız var. Yəni türklər istədiklərinə nail oldular. Hələ də əllərində 3.2.3.2 hündürlüyünə sahib olduqları zaman ərazilərimizdə postlar olacaqdır. Demarkasiya aparılana qədər. Toyuq beyinli insanlar da yaxın illərdə Ermənistanla Azərbaycan arasında sərhədin delimitasiyası və demarkasiyası olmayacağını başa düşürlər. Bu proseslər yalnız Syuniki tamamilə “yeyəndə” başlayacaq. İndi qanuniləşdirdiyimiz bir razılaşma nəticəsində ərazilərimizdədirlər. Təslim olanlar yenidən torpağı təslim etdilər”.

Onu da qeyd edək ki, Azərbaycan, Ermənistan və Rusiya nümayəndələri arasında bir neçə gündür ki, davam edən Qara göl ərazisi ilə bağlı danışıqların hələ təsdiqlənməyən detalları açıqlanıb.

Xəzər Hərbi Tədqiqatlar İnstitutunun yaydığı məlumata görə, razılaşmanın ilk bəndləri Azərbaycan üçün kifayət qədər qanedicidir.

Bildirilir ki, şifahi razılaşmaya əsasən bütün erməni silahlıları Qarabağdan çıxarılır, eyni zamanda, Qırmızı Bazar-Şuşa yolu Azərbaycan Ordusunun nəzarətinə verilir. Həmçinin Qazağın işğalda olan 7 kəndi və Naxçıvanın Kərki kəndi azad edilir.

Qeyd olunur ki, razılaşmaya görə, Zəngəzur bölgəsindən nəqliyyat dəhlizinin açılmasına icazə verilir, erməni tərəfi isə bu öhdəlikləri 2 həftə ərzində yerinə yetirməlidir. Lakin bu iddialarla bağlı hələlik heç bir rəsmi açıqlama verilməyib.

"Sputnik Azərbaycan" isə bildirir ki, erməni mediasının danışıqlar barədə yazdıqlarının leytmotivi bundan ibarətdir: Sabah Azərbaycan hərbçilərinin 2 km geri çəkilməsi (3,5 km irəlilənmişdi) gözlənilir, Azərbaycan Ordusunun 60 hərbçisinin qalacağı 3 müşahidə postu yaradılacaq. Habelə, Azərbaycan hərbçilərinin mövqeləri erməni yaşayış məntəqələrinin yaxınlığında yerləşməyəcək. Erməni KİV-ləri onu da iddia edir ki, Azərbaycan tərəfi hansısa müəyyən şərtlər irəli sürüb, lakin media hələ bunlardan xəbərsizdir, danışıqlar iki gün ərzində davam edəcək.