Pivə və digər alkoqollu içkilərin qəbulu bağırsaq xərçənginin inkişaf riskini artıra bilər.

Bu barədə rusiyalı həkim Aleksey Vasilevski Gazeta.ru-ya müsahibəsində danışıb.

Ümumdünya Səhiyyə Təşkilatının (ÜST) və digər araşdırmaların nəticələrinə görə, müntəzəm alkoqol qəbulu bağırsaq xərçəngi də daxil olmaqla, xərçəngin bir neçə növünün inkişaf riskini artıra bilər. Alkoqol istehlakının miqdarı və intensivliyi ilə əlaqədar bu risk artır.

"Alkoqolun, o cümlədən pivənin tərkibində etanol var ki, bu da orqanizmdə asetaldehidə çevrilə bilər. Asetaldehid isə DNT-yə zərər verə bilən və xərçəngin inkişafına kömək edən maddədir. Bundan əlavə, alkoqol iltihaba səbəb ola bilər və qida maddələrinin udulmasını poza bilər ki, bu da eyni şəkildə onkoloji xəstəliklər riskini artıra bilər", - deyə Aleksey Vasilevski bildirib.

Onun sözlərinə görə, bağırsaq bakteriyaları etanolun mübadiləsində iştirak edir və yoğun bağırsaqda asetaldehidin miqdarını artırır. İçilən alkoqolun dozasının artmasından asılı olaraq asetaldehid orada toplanır. Nəticədə onun konsentrasiyası təhlükəli olmağa başlayır və mutagen proseslərə gətirib çıxarır.