Mütəxəssislər smartfonlarda gizli izləmə funksiyalarını açıqlayıb və onların idarə olunma yollarını göstərib. Əslində isə bu funksiyaların əksəriyyəti zərərsizdir və gündəlik istifadədə fayda verir.

Valyuta.az xəbər verir ki, "Kim Komando"nun məlumatına görə, ekranda görünən kiçik GPS işarəsi geolokasiya izlənməsinin yalnız görünən hissəsidir. Telefonlar əslində sizin harada olduğunuzu mobil rabitə qüllələri, Wi-Fi, Bluetooth və fon siqnalları vasitəsilə də toplaya bilir. Üstəlik, cihazlarda xüsusi funksiyalar mövcuddur ki, onlar ziyarət etdiyiniz yerlərin siyahısını aparır.

"iPhone"da "Significant Locations"

Bu funksiya tez-tez getdiyiniz ünvanların dəqiq jurnalını saxlayır. Məqsəd - "Apple Maps" marşrutlarını uyğunlaşdırmaq, yolda vaxt barədə dəqiq göstərişlər vermək, "Siri" təkliflərini yaxşılaşdırmaq və xatırlatmaları mövqeyə əsasən qurmaqdır. Məlumat yalnız cihazda saxlanılır, şifrələnir və üçüncü tərəflərə ötürülmür.

Necə söndürmək olar:

* Nizamlamalar > Məxfilik və təhlükəsizlik > Geolokasiya xidmətləri > Sistem xidmətləri > Əhəmiyyətli yerlər
* Face ID və ya parol daxil edin
* Tarixçəyə baxın və "Tarixçəni təmizlə" seçin
* Tamamilə dayandırmaq üçün funksiyanı "Söndür" rejiminə keçirin

"Android"də "Google Maps Timeline"

Bu funksiya da oxşar məqsədə xidmət edir – hərəkətlərinizi yadda saxlayır, marşrut və vaxt təklifləri verir, şəxsi tövsiyələr təqdim edir və səyahət vərdişlərini analiz edir. Məlumatlar "Google" hesabına bağlı olur və cihazı dəyişsəniz belə qalır.

Necə söndürmək olar:

* Google Maps açın > Profil > Sizin xronologiyanız
* Üç nöqtə > Məkan və məxfilik nizamlamaları
* "Timeline" funksiyasını söndürün
* İstəsəniz, bütün xronologiya məlumatlarını silin

Tətbiq icazələri

Bu ayrıca bir imkan olub, proqramların sizin yerinizi nə vaxt görə biləcəyini dəqiq tənzimləməyə imkan verir. Bu, həm batareya ömrünü uzadır, həm də məxfiliyi artırır.

Necə idarə etmək olar:

* iPhone: Nizamlamalar > Məxfilik və təhlükəsizlik > Geolokasiya xidmətləri
* Android: Nizamlamalar > Məkan > Tətbiq icazələri
* "Həmişə" seçimini "Yalnız istifadə zamanı" və ya "Qadağan et" variantına dəyişin

Bu funksiyalar smartfonu daha faydalı və rahat etsə də, istəsəniz onların işləmə dərəcəsini məhdudlaşdıra bilərsiniz. Beləcə həm məxfiliyinizi qoruyur, həm də lazımlı imkanlardan yararlana bilirsiniz.