Rusiyalı müğənni İqor Nikolayev iş qadını Aliya Nuriyevanı məhkəməyə verib.

Oxu.Az xəbər verir ki, bu barədə "Shot" "Telegram" kanalı məlumat yayıb.

Nəşrin məlumatına görə, mübahisəyə səbəb Nikolayevin "Vıpyem za lyubov" hitinə bənzər adı olan şokolad qutusu olub. Qablaşdırmada sənətçiyə bənzədilən bığlı və uzun saçlı pişik təsvir olunub.

Nuriyeva müxtəlif bazarlarda şokolad satıb. Əvvəlcə Nikolayev iş qadınından 250 min rubl (təxminən 5 300 manat) tələb edib. Başqırdıstan Respublikasının Arbitraj Məhkəməsi əmtəə nişanına müstəsna hüquqların pozulmasına görə cəriməni 25 min rubla (təxminən 530 manat) qədər azaldıb. Şokolad isə satışdan çıxarılıb.