İranda iqtisadi vəziyyət yalnız pisləşir. Bir çox hökumət və qeyri-hökumət ekspertlərinin fikrincə, 80 illik inflyasiya rekordunun qeydə alınmasında İbrahim Rəisi hökumətinin siyasi təsiri var.
Bizimyol.info xəbər verir ki, dövlətə məxsus “Etemad” qəzeti də hökumətdəki korrupsiyadan danışır. Rejimə bağlı iqtisadçı Hüseyn Roğfardan sitat gətirən nəşr baş verənləri belə təsvir edir: “İstehsal layihəsi iqtisadi və ictimai sahədə klassik korrupsiyanın əsas nümunəsidir. İqtisadiyyat elmlərində korrupsiya ilə bağlı bir tənlik ortaya çıxır ki, bunun bariz nümunəsi məhsuldarlıq layihəsidir. Onlar deyirlər ki, korrupsiya inhisarçılıq, üstəgəl, fəaliyyət azadlığı mənfi məsuliyyətə bərabərdir. Bu, korrupsiyanın baş verdiyi və dövlət resurslarının talan olunduğu bir tənlikdir”.

Rejimin ali lideri Əli Xamenei Rəisinin prezident olması üçün çox çalışdı. Ortada 4 milyon mənzil tikmək, dolların məzənnəsini aşağı salmaq və inflyasiyanın qarşısını almaq vədləri dolaşdı. Amma onun əsl məqsədi yoxsulluq, korrupsiya və yüksək qiymətlərlə mübarizə yox, öz rejiminin əsaslarını üsyana qarşı möhkəmləndirmək idi.

Əgər bu gün Xameneinin yaxınları hökumətin iflasa uğradığını etiraf edirlərsə, bu, cəmiyyətin partlayış vəziyyətində olmasından, onların yoxsul və aclıqdan əziyyət çəkən xalq ordusuna qarşı apardıqları siyasətin uğursuzluğunun nəticələrindən qorxmasındandır.

Dövlətə məxsus “Arman” qəzeti yazır: “Minimum əməkhaqqı ilə çalışan işçi 80 kvadratmetrlik mənzil ala bilmək üçün 170 ildən çox işləməli və hər ay gəlirinin bir hissəsini yığmalıdır. Halbuki bu, reallıqda mümkün deyil. Çünki evi olmayan və kirayəçi olan işçilər hər ay pul yığa bilmirlər. Hətta kirayə haqqını belə ödəyə bilsə, bəxti gətirib”.

Tehranda yaşayış binasında mənzilin kvadratmetrinin orta qiyməti keçən ilin qışında 47 milyon rialdan (təxminən 1100 dollar) bu il yaz və yayın əvvəlində 65 milyon riala (1550 dollardan bir qədər az) yüksəlib. İqtisadiyyat ekspertlərinin proqnozları göstərir ki, 2023-cü ildə mənzil qiymətlərinin artımı 40-50 faiz civarında olacaq”.

İran iqtisadiyyatı yalnız geri gedir. Xalq etirazları artır. Hətta təqaüdçülər də hökumətdən ciddi narazılıq edir. Vəziyyətin çox pis olduğunu daha gizlətmək də olmur.

Aytən, Bizimyol.info