Məşhur reper Lil Nas X Los-Ancelesdə polis əməkdaşları ilə mübahisədən sonra saxlanılıb. Bu barədə şəhər polis idarəsi (LAPD) məlumat yayıb.
Ajans.az BBC-ə istinadən xəbər verir ki, hadisə cümə axşamı səhər saat 05:30-da baş verib. Ventura Bulvarında yalnız alt paltarı ilə gəzən bir şəxs barədə polisə müraciət daxil olub. Hadisə yerinə gələn əməkdaşlar həmin şəxsin “Old Town Road” hit mahnısının ifaçısı Lil Nas X olduğunu müəyyənləşdiriblər.

Müğənninin polislə insident zamanı “ittiham edildiyi” və “batareya şübhəsi” ilə saxlanıldığı bildirilir. Daha sonra sənətçi mümkün overdose (dərman və ya maddədən artıq qəbul) şübhəsinə görə xəstəxanaya aparılıb. Onun vəziyyəti barədə əlavə məlumat açıqlanmayıb.

Hadisədən qısa müddət sonra TMZ reperin küçədə yalnız alt paltarı və kovboy çəkmələri ilə rəqs etdiyi, yoldan keçənləri “ziyafətə dəvət etdiyi” anları əks etdirən video yayıb.

Qeyd edək ki, Lil Nas X bu ilin sonuna planlaşdırılan ikinci studiya albomu “Dreamboy” üzərində işləyir. O, rəsmi buraxılışdan öncə yeni musiqilərini sosial şəbəkələrdə təqdim etməyi planlaşdırır.

Montero Lamar Hill adı ilə dünyaya gələn sənətçi, 2019-cu ildə “Old Town Road” mahnısı ilə dünya şöhrəti qazanmışdı. Mahnı 17 həftə ardıcıl Billboard Hot 100 siyahısında birinci yeri tutaraq rekord qırmış, eyni zamanda iki “Qremmi” mükafatına layiq görülmüşdü.

Karyerası ərzində Lil Nas X tez-tez mühafizəkar çevrələrin tənqidinə məruz qalıb. Xüsusən də “Montero (Call Me By Your Name)” mahnısına çəkilən klip “azğın” və “təxribatçı” adlandırılmışdı. Sənətçi isə buna istehzalı videolar və sosial şəbəkə paylaşımları ilə cavab vermişdi.