"Birləşmiş Ştatlar və onun demokratik müttəfiqləri Rusiya, İran və Çin ilə gərgin münasibətlərlə üzləşə bilər, çünki Ukrayna və Qəzza zolağındakı müharibələr qlobal rəqabəti gücləndirir. Amma İŞİD üçün münaqişənin bütün tərəfləri məhv edilməli olan müsəlman inancının düşmənləridir".

Qaynarinfo xəbər verir ki, bunu "The Wall Street Journal" yazır.

Nəşr qeyd edir ki, son onilliklərdə Rusiyada ən dəhşətli terror aktına çevrilən Moskva ətrafındakı "Krokus Siti Hall"da baş vermiş terakt yalnız bu faktı təsdiqlədi.

"Böyük güclər arasında rəqabət canlıdır və yaxşıdır, lakin bunun İŞİD üçün heç bir əhəmiyyəti yoxdur. Biz Pekin, Moskva və Vaşinqton arasında böyük fərqlər görsək də, onlar hamımızı hədəf kimi görürlər. Bu, transmilli təhlükədir", deyə "Soufan Group" konsaltinq şirkətinin direktoru Kolin Klark bildirib.

Analitiklərin fikrincə, Moskvadakı terakt qrupun özünü bütün dünyada tərəfdarlarını səfərbər etməyə qadir olan güclü qlobal şəbəkə kimi yenidən qurmaq bacarığını nümayiş etdirir.

İŞİD hücumun arxasında hansı qolun olduğunu dəqiqləşdirməsə də, ABŞ rəsmiləri ya İslam Dövləti-Xorasan Vilayətini, ya da İŞİD-X-i günahlandırıb.

"İŞİD-X İslam Dövlətinin ən mühüm qollarından biridir. İŞİD-X-ın yüksəlişi terror təşkilatının Suriya və İraqdakı beşiyindən uzaqlaşdığını göstərir", deyə WSJ yazır.

Bundan əlavə, qeyd edilir ki, 2022-ci ildən etibarən İŞİD Moskvanın Ukraynaya təcavüzündən istifadə edərək, öz üzvlərini toplayır, xüsusən də Rusiya üçün döyüşən çeçen müsəlmanları və Ukrayna tərəfində vuruşan Krım tatarları və çeçen müsəlmanlarını "kafirlər" arasında müharibəyə müdaxilə etməməyə və əvəzində İŞİD-ə qoşulmağa çağırır.

"İslam Dövlətinin strategiyası daha az, lakin daha təsirli hücumlar həyata keçirməkdir", deyə İslamabadda cihadçı qrupları izləyən tərəfsiz bir platforma olan "Xorasan Gündəliyi"nin tədqiqat direktoru Rikkardo Valle bildirib.

Onun fikrincə, qrup genişmiqyaslı hücumlar vasitəsilə qlobal diqqəti cəlb etməklə, potensial izləyiciləri arasında möhkəmlik və güc imicini yaymağı hədəfləyir.

Qeyd edək ki, martın 22-də silahlı şəxslər Moskva yaxınlığındakı "Krok Siti Hall"a hücum edib. Nəticədə 137 nəfər həlak olub, 180-dən çox insan yaralanıb. Hücuma görə məsuliyyəti İŞİD öz üzərinə götürüb.