Qaqauziya Xalq Məclisi (yerli parlament) və İcraiyyə Komitəsi (yerli hökumət) regionun rəhbəri Yevgeniya Gucula qarşı Kişinyov məhkəməsinin çıxardığı hökmə cavab olaraq kütləvi dinc etiraz aksiyalarının keçirilməsi barədə qərar qəbul edib.

32gun.az xəbər verir ki, bu barədə Qaqauziya parlamentinin saytında yayımlanan qətnamədə qeyd olunub.

Qərarda bildirilir: “Qaqauziya ərazisində Qaqauziya rəhbəri Y.A. Guculun və muxtariyyətin qanuni hüquqlarının müdafiəsinə yönəlmiş kütləvi dinc etiraz aksiyalarının təşkil və keçirilməsi”.

Həmin tədbirlər çərçivəsində əlaqələndirmə məqsədilə regional qərargahın yaradılması da nəzərdə tutulur. Sənəddə qaqauz xalqına həmrəylik, təmkin və vətəndaş birliyini qorumaq, eləcə də hüquqlarını müdafiə etmək çağırışı yer alıb.

Qeyd edək ki, avqustun 5-də Moldova məhkəməsi Yevgeniya Guculu müxalif “Şor” partiyasının maliyyələşdirilməsi ilə bağlı qanun pozuntularına görə 7 il müddətinə azadlıqdan məhrum edib. Hökm elan edildikdən sonra Kişinyovdakı məhkəmə binası önündə Guculun tərəfdarları ilə polis arasında toqquşmalar yaşanıb.