Rusiyanın Yaroslavl şəhərində hicablı qıza sataşan kişi ağır yaralı vəziyyətdə xəstəxanaya aparılıb.

Milli.Az KP-yə istinadən bildirir ki, insident şəhərin Dzerjinski rayonunun Trufanov küçəsində yaşanıb. Dünən axşam yerli vaxtla saat 20 radələrində kafedə içib sərxoş olmuş bir qrup gənc küçədən keçən hicablı qadına sataşıblar. Onlardan biri qadının yanına qaçıb, hicabı dartıb və yerə atıb.

Sərxoş gənclər bundan vəcdə gələrək gülüşüblər və yollarına davam ediblər. Lakin az sonra travmatik tapança ilə silahlanmış bir kişi onları haqlayıb, qadının hicabına əl atanın başına atəş açıb.
Yaralı indi Solovyov xəstəxanasının reanimasiya bölməsindədir.
İlkin məlumatlara görə, atəş açan şəxs hicablı qadının əridir.