İraqın təhlükəsizlik ekspertlərindən olan Fazil Əbu Raqif İŞİD terror təşkilatının yüksək rütbəli liderlərinin 95 %-nin İraq daxilində və xaricdə gizləndiklərini iddia edərək, səlahiyyətliləri mümkün qədər tez zamanda hərəkətə keçərək onları həbs etməyə çağırıb. Fazil Əbu Raqi bu barədə Londonda yerləşən "Asharq Al-Awsat" qəzetinə verdiyi müsahibəsində danışıb. Bu gün İraq ordusunun "İŞİD-in qəssabı" olaraq bilinən Əbu Taha əl-Tunisini və 9 köməkçisini həbs etməsi barədə xəbərə şərh verən iraqlı ekspert, "Heç kəs inkar edə bilməz ki, İŞİD liderlərinin 95 faizi vuruşmur. Onlar İraqın daxilində və xaricində qaçaraq gizlənməyi üstün tuturlar", - deyə söyləyib. Xatırladaq ki, İraq qüvvələrinin Suriya ilə sərhəddə yerləşən Rava şəhərini İŞİD-dən azad etməsi ilə ölkədə İŞİD varlığının sona çatdığı elan edilmişdi. Lakin İraqın bir çox səhralıq ərazilərində hələ də gizlənən terror təşkilatı ünsürləri mövcuddur və onlar ara-sıra təhlükəsizlik qüvvələrinə qarşı terror aktları həyata keçirirlər.
eastnews.org