Yeni Azərbaycan Partiyasının bu ilin sentyabr ayında keçirdiyi iclasda verilən qərara görə, deputat-rektorlar iki yoldan birini seçməlidirlər: onlar ya rektor kimi fəaliyyət göstərməlidirlər, ya da deputat kimi. Artıq 4 rektor V çağrış Milli Məclis seçkilərində qalib olub və onların rektorluqdan istefası gözlənilir. Bunlar Aqiyə Naxçıvanlı, Səməd Seyidov, Əhliman Əmiraslanov və Ağacan Abiyevdir.

Bəs yeni parlamentdə təmsil olunacaq prorektor-deputatlar necə, onlar öz vəzifələrində qalacaq, ya gedəcək?

Deputat seçilən prorektorlardan biri də Tibb Universitetinin elmi işləri üzrə prorektoru Rafiq Məmmədhəsənovdur. 104 saylı Gədəbəy-Tovuz seçki dairəsində yenidən mandat qazanan Rafiq həkim Modern.az-a açıqlamasında bildirib ki, prorektorluqdan istefa vermək haqda hələ düşünməyib.

“Bu söhbət rektor olan şəxslərə aid idi ki, onlar seçim etsinlər. Bunun prorektorlara aidiyyatı yoxdur. Hələlik prorektor kimi fəaliyyətimi davam etdirib-etdirməyəcəyimi bilmirəm. Nə olsun ki, deputat seçilmişəm, bu mənim öz məsələmdir”.

Bakı Slavyan Universitetinin prorektoru, 98 saylı Şəmkir şəhər seçki dairəsndən ikinci dəfə deputat mandatı qazanan Sahibə Qafarova isə sualmızı cavablandırmaq istəməyib.