Həya hissi hər kəsdə olmaz! Bu, qadınlarda namusa və ismətə, kişilərdə isə şərəf və qürura bağlı keyfiyyətdir. Yəni, qadının həya dərəcəsi ilk baxışdaca onun iffəti və namusu haqda təəssürat yaratdığı kimi, bir kişinin abır-həyanı gözləməsi də, yaxından tanımasan belə, kənardan onun xarakteri, şərəfi və qüruru haqda təsəvvür formalaşdırar. Özü də bu, mənim yox, dünyanın ən ağıllı, müdrik başlarının, hətta alimlərinin gəldiyi qənaətdir.

Məsələn, qədim yunan filosofu Diogen həyanı “İnsan dəyərlərinin tamamlayıcısı” sayar, ingilis alim Tomas Yunq “Həyalı insan əclaf olmaz” deyər, alman Şiller “İnsanın günahları artdıqca, həyası azalar” tezisini irəli sürər, ingilis yazıçı Bernard Şou isə elə açıqca “İnsan nə qədər çox şeydən həya edərsə, bir o qədər də şərəf və qürur sahib olar” yazardı… Fikrimcə, həya haqqında ən möhtəşəm fikri isə Həzrəti Əli deyib: “Həyanın zirvəsi insanın özünün özündən həya etməsidir”.

Dostlar, bu həya mövzusuna toxunmağım səbəbsiz deyil! Öz tamahı, nəfsi ucbatından ailəsini və ölkəsini nəinki İngiltərədə, bütün dünyada rəzil-rüsvay etmiş oliqarx-deputat Cavanşir Feyziyevin baş verənlərə görə xalqdan, seçicilərindən üzr istəmək və sonra da sakitcə tutduğu vəzifələrdən istefa vermək əvəzinə, utanıb-qızarmadan çıxıb onun naqis əməllərini dilə gətirənləri suçlaması və aşağılamasının, “Bütün vəsaitlər şəffaf və qanuni yolla əldə edilib… Mənim siyasət və məişət dələduzlarına heç bir hesabat vermək fikrim yoxdur” deməsinin bircə adı var: utanmazlıq, abırsızlıq, sırtıqlıq, həyasızlıq!

Adama deyərlər, yaxşı, dələduz saydığın bu jurnalist və siyasətçilər qarşısında məsuliyyətin yoxdur və hesab vermək istəmirsən, bəs, bu xalqa niyə hesabat vermirsən?! Mandatını cibində hərlədiyin xalqıdamı dələduz sayırsan, ay oğru, ay cibgir, ay fırıldaqçı! Məgər sən İngiltərə məhkəməsində artıq varlığı sübuta yetirilmiş milyonlarını halal və qanuni yollarlamı qazanmısan?! Yalançının lap…! Sən heç halalla haramın fərqini bilirsənmi?! Dərmanpulu tapmadığından xəstə körpələri gözlərinin qabağında ölən, aptek qapılarında sürünən və dilənən valideynlərin cibinə girib son qəpiyinədək çırpışdırmaqla toplayıb xaricə daşımamısanmı bu milyardları?!

Unutma: Allah belələrini rüsvayi-cahan etməmiş, öldürmür! Görəcək günlərin hələ qabaqdadır! Hə, bir də şərəf və ləyaqət davası açsan, o faktı da unutma: xalqdan oğurlayıb xaricə daşıdıqlarınızı həyat yoldaşlarınızın və qızlarınızın adına yazdırıb, onları yad ölkələrin məhkəmə qapılarında, yad hakimləri önündə süründürb, alçaltmayın! Bir türk və müsəlman kişisinin şərəfini və qürurunu yerə vuran, onu ən çox alçaldan öz cinayət əməllərinə ailəsini ortaq etməsidir, ay türk əxlaqından yazan deputat Feyziyev! Bu, sənə və sənin kimilərə toxunmasa da, dövlətimizin simvolunu pencəyinin yaxasına taxdığından, bizə toxunur! O bayraq simvolu namərd sinələrdə daşınmağa layiq deyil!

Elxan Şükürlü