Azərbaycanda tibb sahəsinə məsul olan qurumlar zaman-zaman “səhiyyəmiz inkişaf edir, ən son model tibbi avadanlıq və aparatlar ölkəyə gətirilir” deyə pafoslu çıxışlar edirlər. Amma səhiyyəmizin inkişafından ağızdolusu danışan elə həkimlərimizin özləri müalicə və müayinə üçün xarici ölkələrə, xüsusilə Almaniya, Türkiyə, İsrail və Amerikaya üz tuturlar. Nəinki həkimlər, klinika rəhbərləri, məmurlar, yüksək çinli nümayəndələr belə səhhətlərindəki narahatlıqla bağlı xarici ölkələrin səhiyyə xidmətlərinə müraciət edirlər.

Belə çıxır ki, Azərbaycan səhiyyəsinin inkişafından danışan bu şəxslər öz həkimlərimizə və tibb müəssisələrimizə etibar etmirlər.

Nümunə olaraq “German Hospital”ın rəhbəri İlham Əliyevi misal gətirə bilərik. O, səhhəti ilə bağlı hazırda adını açıqlamadığı xarici ölkələrdən birində müalicə olunur.

Mövzu ilə bağlı Bizim.Media-ya danışan Azərbaycan Tibb Universitetinin dosenti, fizioloq, tibb üzrə fəlsəfə doktoru Rəşid Mahmudovun sözlərinə görə xarici ölkələrin səhiyyəsində hər sahə üzrə ayrı-ayrı mütəxəssis olduğu üçün ora üz tutulur:

“Məsələn travma başa, boyuna, qola, ələ, kürəyə döş qəfəsinə, bud sümüyünə, çanağa və ayağa da olar. Azərbaycanda bu nahiyələrin hamısını bir adam bilməlidir. Amma xarici ölkələrdə çəçələ, şəhadət, baş və digər barmaqaların travmatoloqu ayrıdır. Eləcə də digər nahiyələrin... Hərəsi ayrı-ayrı travmatoloqlardır.

Bizdə bir travmatoloq yuxarıda sadaladığımız nahiyələrin hamısını bilməldir. O da mümkün olan şey deyil və çətindir. Bu səbəbdən də insanlar və həkimlər xaricə gedirlər. Eyni zamanda pulu çox olanlar xaricə üz tutur və elə onların da həkimlərinə inanır.

Məsələn, mən revmatoloqam. Revmatizmin 120 növü var və bir o qədər də çox onun fəsadları var. Oynaq yeyilməsi, ostroxondroz və ya oynaqda mayenin miqdarının azalması var. Xaricdə bunlar ayrı-ayrı bir sənətdir. Bizdə isə kolxoz kimi hamısını mən eləməliyəm, alınmır bu...

”Mütəxəssislərimiz yetişmir” fikrini demək də doğru deyil. Sadəcə onun üçün ayrıca şərait və aparatlar olmalıdır. Azərbaycanda bu məsələ çox çətindir. Hər şeyi göstərən və bilən aparatlar hələki bizdə yoxdur. İş təkcə aparatla da bilmir, gərək onun mütəxəssisi hazırlansın. Amma yavaş-yavaş düzələcək və buna da əminəm”.

Alçina Amilqızı, Bizim.Media