Xəbər verildiyi kimi, deputat Hadı Rəcəbli Milli Məclisin Əmək və sosial siyasət komitəsinin bu gün keçirilən iclasında məcburi köçkünlərin ünvanına tənqidi fikirlər səsləndirib.

O, H.Rəcəbli Prezident İlham Əliyevin məcburi köçkünlərlə bağlı verdiyi sərəncama münasibət bildirərkən deyib ki, məcburi köçkünlərin yaşadıqları evlərdə olarkən onların işıq sperallarından istifadə etdiklərini, sonra isə pəncərəni açıq qoyduqlarının şahidi olub.

H.Rəcəblinin bu açıqlaması sosial şəbəkələrdə ciddi müzakirə mövzusuna çevrilib.

Əslən Cəbrayıl rayonundan olan tanınmış jurnalist Seymur Verdizadə Mia.az-a açıqlamasında Hadı Rəcəblinin bu çıxışını "deputata yaraşmayan hərəkət” adlandırıb.

Jurnalist deyib ki, məcburi köçkünlər Prezident İlham Əliyevin məlum sərəncamını anlayışla qarşıladıqları üçün Hadı müəllimin əl-ayağa düşməyinə ehtiyac yoxdur:

"Dövlətin resurslarına qənaət etmək hər bir Azərbaycan vətəndaşının, o cümlədən, məcburi köçkünlərin borcudur. Bizim ailəmiz, o cümlədən, tanıdığım yüzlərlə, minlərlə köçkün ailəsi dövlətin yaratdığı imkanlardan heç vaxt sui-istifadə etməyib. Üstəlik, bizim Hadı müəllim kimi milyonlarımız yoxdur ki, əlimizi qulağımızın dibinə qoyub, sağa-sola pul dağıdaq. Yurd-yuvamız, ev-eşiyimiz işğal altında olduğu üçün onsuz da 24 ildi qənaət rejimində yaşayırıq”.

S.Verdizadə deputat H.Rəcəblinin növbəti dəfə insanların heysiyyatı ilə oynamasına təəssüf etdiyini bildirib:

"Hadı müəllimin məcburi köçkünlərə ağıl öyrətməyinə ehtiyac yoxdur. Guya məcburi köçkünlər başa düşmürlər ki, evdə "plitka” yandıranda qapı-pəncərəni bağlamaq lazımdır? Məcburi köçkünlərin arasında Hadı Rəcəblidən, yüz dəfə, hətta min dəfə savadlı, səviyyəli insanlar var. Nə vaxtsa baş vermiş, bəlkə də baş verməmiş bir hadisəni ümumiləşdirib bütün məcburi köçkünlərin ayağına yazmaq ədalətsizlikdir. Hadı Rəcəbliyə heç kim ixtiyar verməyib ki, insanların heysiyyatına toxunsun”.