Bu gün Binəqədi rayon Polis İdarəsinə çağırılan tanınmış hüquqşünas Aslan İsmayılovdan müstəntiq İlqar Həmidov izahat alıb:

PRESSDAY.az bildirir ki, Aslan İsmayılovun sözlərinə görə, ondan qanun çərçivəsində izahat alınıb:

"Mən də nə varsa, hamısını dedim. Mənə qarşı ittiham qaldırılıb ki, guya mən məhkəmənin qapısını sındırmışam, təhqir etmişəm, məhkəməyə hörmətsizlik etmişəm".

O, ittihamla razılaşmadığını bildirib.

Binəqədi rayon Məhkəməsinin hakimi Rəşad Əliyevin ərizəsi əsasında Binəqədi rayon prokuroru Nazim İmanov Aslan İsmayılov haqqında Cinayət Məcəlləsinin 221.1. (Xuliqanlıq, yəni ictimai qaydanı kobud surətdə pozan, cəmiyyətə açıqca hörmətsizlik ifadə edən, vətəndaşlar üzərində zor tətbiq olunması ilə və ya belə zorun tətbiq edilməsi hədəsi ilə, habelə özgənin əmlakının məhv edilməsi, yaxud zədələnməsi ilə müşayiət edilən qərəzli hərəkətlər) maddəsi ilə cinayət işi başlayıb.