"Ukraynaya ən azından NATO-ya bənzər təhlükəsizlik zəmanətləri verilməlidir və bu, həyatı əhəmiyyətli məsələdir..."

Ukrayna ilə Rusiya arasında aparılan sülh danışıqlarında müzakirə edilən ən mühüm məsələlərdən biri Ukraynanın təhlükəsizlik zəmanətləri məsələsidir.

Bu barədə Ukrayna prezidenti Vladimir Zelenski Çerniqov vilayətinə səfəri zamanı bəyan edib. Məlumatı "nv.ua" nəşri yayıb.

Danışıqlar zamanı Ukraynanın prioriteti güclü ordunun olmasıdır. "Bu, "qırmızı xətt"dir - ordumuzun sayını dəfələrlə azaltmaq baş tutmayacaq. Düzünü desəm, biz ordumuzun hazırki sayını qorumaq üçün hər şeyi edəcəyik. Bu, böyük ordudur, müharibənin əvvəlində olduğundan üç dəfə böyükdür. Ordu yalnız müasirləşə bilər. Müharibə bitdikdən sonra belə dəyişikliklər ola bilər", - Zelenski deyib.

O, həmçinin əlavə edib ki, digər bir "qırmızı xətt" işğal altındakı ərazilərin Rusiyanın tərkibində tanınmasıdır.

"Hər halda, bunlar müvəqqəti işğal altındakı olan ərazilərdir. Ədalətli sülh o zaman olacaq ki, bütün ərazilər geri qaytarılacaq. Amma kompromis olaraq bəzi ərazilərin geri qaytarılmasının diplomatik yolla həyata keçirələcəyi tək mümkün yol olacaq. Çünki müharibə bu qədər davam edə bilməz. Buna görə də biz hər şeyi edəcəyik ki, Ukraynanın ərazi bütövlüyü bərpa olunsun, bu bizim üçün vacib olan məsələlərdir", - Zelenski əlavə edib.

Bundan əlavə, Zelenskiyə görə, danışıqların digər əsas məsələsi təhlükəsizlik təminatlarıdır.

"NATO ilə bağlı məsələ hələ mürəkkəbdir. Amma hər halda bu məsələ masadan heç kim tərəfindən çıxarılmır. Ən azından biz deyirik ki, əgər bu gün kimlərsə dəstəkləmək istəməsə də, gələcəkdə nə olacağını görəcəyik. Amma vacib olan odur ki, nə qədər ki, biz birlikdə deyilik, bizə NATO-ya bənzər müvafiq təhlükəsizlik zəmanətləri verilməlidir və bu, həyatı əhəmiyyətli məsələdir. Burada söhbət müvafiq kontingent və bizim arxalana biləcəyimiz tərəfdaşlarımızdan gedir", - Zelenski deyib.

Sülh danışıqları: vacib xəbərlər

Ötən gün Qərbin bir sıra KİV-ləri bildirib ki, Ukraynada müharibənin sona çatması ilə bağlı danışıqlar ləngiyir. Xüsusən "Reuters" agentliyi yazır ki, Tramp administrasiyası artıq müharibənin yaxın zamanda bitəcəyinə inanmır. Jurnalistlər həmçinin qeyd edir ki, Ağ Ev Ukrayna və Rusiya üzərində yeni təzyiq yollarını nəzərdən keçirir.

Bununla yanaşı, "The Wall Street Journal" yazır ki, Ukrayna və Rusiya Trampa qarşı oxşar taktika yürüdür, çünki ABŞ prezidentinin müharibəni bitirmək istəyi hər iki ölkənin yanaşmalarına ziddir. Həmçinin qeyd olunur ki, hər iki tərəf ABŞ-ın bütün tələblərini yerinə yetirmir.