Müəyyən düzəlişlərdən sonra qanun layihəsi yenidən müzakirəyə çıxarılacaq


Deputatın etik davranışı ilə bağlı İnzibati Xətalar Məcəlləsinə və Milli Məclisin Daxili Nizamnaməsinə düzəlişlərin edilməsinə dair layihənin müzakirəsi təxirə düşüb. Oktyabrda müzakirəsi nəzərdə tutulan layihə ilə bağlı müzakirələr növbəti sessiyada aparılacaq.

Layihədə əsas mübahisəli məqam davranışına və yol verdiyi digər ciddi nöqsanlara görə deputat mandatının geri alınmasının qaydasının tənzimlənməsidir. Bu halda hansı tərəfin qərarına əsasən deputatın mandatdan məhrum edilməsi məsələsi ilə bağlı ortaq məxrəcə gəlinməyib.

Qeyd edək ki, keçən sessiyada Milli Məclis "Azərbaycan Respublikası Milli Məclisi deputatının etik davranış qaydaları haqqında” qanun qəbul edib, qanun Azərbaycan Prezidenti tərəfindən təsdiq olunub. 13 maddədən ibarət olan qanunda Milli Məclisin iclaslarında etik davranış, insanların hüquqlarına, işgüzar nüfuzuna hörmət, qərəzsizlik, qanunsuz maddi və qeyri-maddi nemətlərdən, imtiyazlar və güzəştlərdən imtina, hədiyyə alma qadağası şərt kimi qoyulur.

Layihəyə sonradan edilən yeniliklərdə 4-cü maddədə deputata hüquqi şəxsin işgüzar nüfuzunu ləkələyə biləcək hərəkətlər etməməklə yanaşı, qeyd olunmuş "bu cür çağırışlar etməmək” qadağası götürülüb.
Millət vəkili Fazil Mustafanın sözlərinə görə, layihənin təxirə salınması təkmilləşdirmə işləri ilə bağlıdır.

Yoxsa ki, burada söhbət "Deputatın etik davranışı haqqında” qanun layihəsinin gündəlikdən tamamilə çıxarılmasından getmir. Konstitusiyada müvafiq müddəalar olduğu üçün belə bir qanunun qəbulu mütləqdir. Sadəcə olaraq müəyyən qədər mübahisə doğuran məsələlər olduğu üçün qanun layihəsi yenidən işlənəcək.

Etiraz doğuran əsas nüans da davranışına və yol verdiyi digər nöqsanlara görə deputat mandatının geri alınması ilə bağlı sadə mexanizmin dəyişdirilməsi və bunun məhkəmə orqanları vasitəsilə həyata keçirilməsinin vacibliyidir. Yəqin ki, müəyyən cilalanmadan sonra qanun layihəsi yenidən müzakirəyə çıxarılacaq. Ona görə də təxirəsalınmadan daha çox üzərində son işləmələr gedir kimi dəyərləndirmək olar.

F.Mustafanın fikrincə, sözügedən maddədən başqa qanun layihəsində narazılıq doğuran heç bir qeyd yoxdur. Qalan bütün maddələr məqsədəuyğundur.