ABŞ senatorları Rusiyaya qarşı yeni sanksiyaların tətbiq olunmasını tələb edirlər.

Axar.az xəbər verir ki, bu barədə məlumatı “Röyter” yayıb. Senatorların buna səbəb kimi Rusiyanın ABŞ-da keçirilən Konqres seçkisinə mane olmağa çalışdığı göstərilib.

“Röyter” artıq amerikalı senator Lindsi Qremin yeni sanksiyaların aktiv tərəfdarları sırasında yer aldığını açıqlayıb. Qrem yeni sanksiyaların sərt olmasını və Trampla Putinin mümkün ikinci görüşündən əvvəl tətbiq edilməsini istəyib.

Senator Mark Rubio isə “Deter” adlı qanun layihəsinin qəbul edilməsini tələb edib. Rubionun təklifinə əsasən, əgər ABŞ kəşfiyyatı Rusiyanın seçkiyə müdaxiləsi haqqında məlumatlar təqdim etsə, o zaman Moskvaya qarşı avtomatik yeni sanksiyalar işə düşəcək. Senator qanun layihəsi ilə bağlı dinləmələrin avqustun əvvəlində baş tutacağını bildirib:

“Yeni qanun layihəsi sanksiyaları daha avtomatik edəcək. O, Rusiyanın maliyyə, energetika və müdafiə sektoruna aid ediləcək”.