Ermənistan parlamentin “Mənim şərəfim var” fraksiyasının rəhbəri, “Vətən” partiyasının lideri Artur Vanetsyan deputat mandatından imtina edib.

"AzPolitika.info" erməni mediasına istinadən xəbər verir ki, bu barədə spiker Alen Simonyan məlumat verib.

“Milli Məclisin Reqlamenti” qanununa əsasən, deputat bir həftə ərzində yazılı şəkildə ərizəsini geri götürməkdən imtina etməzsə, onun səlahiyyətlərinə xitam verilməsi barədə protokol tərtib olunacaq. Bu protokol parlamentin sədri tərəfindən imzalanacaq. Protokol dərc edildiyi andan deputatın səlahiyyətlərinə xitam veriləcək.

Bundan əvvəl Vanetsyan bildirib ki, Ermənistan parlamenti hakimiyyətin destruktiv fəaliyyətinin dayandırılması və ölkəni böhrandan çıxarmaq üçün effektiv platforma olmaqdan çıxıb. Onun sözlərinə görə, “Vətən” partiyası mübarizəni parlament divarlarından kənarda davam etdirəcək.