İranda etiraz aksiyalarında iştirak edən Məhəmməd Mehdi Kərimi və Məhəmməd Hüseynin edamında sonra teokratik rejim daha üç nəfər barəsində ölüm hökmü çıxarıb.

Qaynarinfo İran mənbələrinə istinadən xəbər verir ki, həmin şəxslər İsfahanda keçirilən aksiyalar zamanı həbs edilən Saleh Mirhaşim Baltaği, Məcid Kazemi Şeyxşabani və Yaqubi Kürdsəfelidir.

Onlar İsfahan şəhərinin Xanə məhəlləsində keçirilən aksiyalarda iştirak edib. Bu baxımdan, həbs edilənlər barəsindəki cinayət işi şərti olaraq "İsfahan Xanə” işi adlandırılır.

Həmin aksiyalarda iki Bəsic üzvü öldürülüb. Teokratik rejim isə Saleh Mirhaşim Baltağini, Məcid Kazemi Şeyxşabanini və Yaqubi Kürdsəfelini "Allaha qarşı müharibə” ittihamı ilə mühakimə edib. Məhkəmə hər üç şəxsin təqsirli olduğu qənaətinə gəlib və onlar barəsində edam hökmü çıxarılıb.

Bu hadisə teokratik rejimin edamları davam etdirəcəyini göstərir. İranlı fəallar deyir ki, hakimiyyətin edamları davam etdirməsi etirazların səngiməməsi ilə bağlıdır.

Almaniyada mühacir həyatı yaşayan iranlı hüquqşünas Hağı Mahmudinin fikrincə, rəsmi Tehran bu addımların heç də onun xeyrinə olmadığının fərqindədir: "İstər daxildə, istərsə də beynəlxalq aləmdə İrandakı rejimin bu qansız addımlarına kəskin reaksiyalar var. Lakin hakimiyyət bunu görməzdən gəlir. Belə rəy formalaşdırmağa çalışır ki, bu reaksiyalardan əndişələnmir. Halbuki artıq hakimiyyətin öz daxilində edamlarla bağlı tərəddüdlər var”.