Pakistanın keçmiş baş naziri İmran Xanın saxlanılmasından sonra ölkədə küçə etirazları davam edir.

Etirazlar nəticəsində həyatını itirənlərin sayı 8-ə çatdığı, 27 nəfərin yaralandığı bildirilir.

Təhlükəsizlik qüvvələri tərəfindən saxlanılanların sayı isə minə yaxınlaşıb.

Pakistanda keçmiş baş nazir İmran Xanın korrupsiya ittihamı ilə həbsindən sonra dünən ölkənin bir çox yerində küçələrə çıxan minlərlə Xan tərəfdarı ilə polis arasında qarşıdurmalar davam edir.

Xan tərəfdarlarının nümayişləri səbəbindən ordu paytaxt İslamabada və ölkənin ən sıx əhalisi olan Pəncaba əyalətinə əlavə qüvvələr göndərib. Hayber Paxtunxva əyalətinin səlahiyyətliləri də təhlükəsizliyin təmin edilməsi üçün qoşunların göndərilməsini tələb ediblər. Məktəblər zorakılıq səbəbindən bağlanarkən, bəzi magistral yollar nəqliyyata bağlanıb.

Pakistanın daxili işlər naziri Rana Sanaullah dünən verdiyi açıqlamada Xan və həyat yoldaşının təslim olmaq xəbərdarlığına məhəl qoymadıqları üçün Milli Hesabatlılıq Bürosu (NAB) tərəfindən həbs edildiyini bildirib.Onların bir milyon dollar dəyərində torpaq almaqda ittiham olunduğunu açıqlayıb.

Sanaullah əlavə edib ki, Britaniya rəsmiləri çirkli pulların yuyulması ilə bağlı Pakistana 240 milyon dollar qaytarıb, lakin Xan pulu milli xəzinədə saxlamaq əvəzinə podratçıya qaytarıb.
HaberGlobal