Fransa hökuməti döyüş bölgəsindən çoxlu sayda xəstənin mümkün qəbulu üçün tibbi personalın hazırlanması ilə bağlı regional səhiyyə qurumlarına (ARS) göstərişlər göndərib.

Bu barədə həftəlik "Le Canard enchaine" nəşri məlumat yayıb.

Həkimlərin və tibb işçilərinin hazırlığı Fransanın Müdafiə və Milli Təhlükəsizlik üzrə Baş Katibliyinin tələbi ilə Səhiyyə Nazirliyinin təşəbbüsü ilə başlanıb və 2026-cı ilin mart ayına qədər başa çatdırılmalıdır. Mülki xəstəxanalar 10 gündən 180 günədək 100 mindən 500 minədək insanı qəbul etməyə hazır olmalıdır.

Döyüş bölgələrindən xəstələri qəbul etmək və onları öz ölkələrinə qaytarmaq üçün əsas nəqliyyat qovşaqlarının yaxınlığında tibb mərkəzlərinin yaradılması planlaşdırılır. Fransa genişmiqyaslı münaqişə baş verəcəyi təqdirdə müttəfiq ölkələr üçün arxa cəbhə kimi məsuliyyətini öz üzərinə götürməyə hazırlaşır.

Nazirlik əmrini şərh edərkən hazırkı beynəlxalq vəziyyətdə tibbi yardımın göstərilməsi şərtlərinin əvvəlcədən müəyyən edilməsi zərurətinə istinad edib. Rəsmilər, həmçinin Fransanın NATO çərçivəsində alyansın bir və ya bir neçə üzvünə silahlı hücum olacağı təqdirdə güc tətbiqi də daxil olmaqla bütün tədbirləri görmək öhdəliyini xatırladıblar.