“Heç olmasa, ölkə ictimaiyyətinə hörmət edib, istefa versin”

Müasir Müsavat Partiyasının sədri Hafiz Hacıyev “Yeni Müsavat”a açıqlamasında son zamanlar ölkədə məmur övladlarının özbaşınalığından danışıb. O, əsasən Qaçqın və Məcburi Köçkünlərlə iş üzrə Dövlət Komitəsinin sədri (“Qaçqinkom”) Əli Həsənovu hədəf alıb: “Cəmiyyətdə son zamanlar məmur övladları ilə bağlı xoşagəlməz hallar yaşanır. Məsələn, ”Qaçqınkom"un sədri Əli Həsənovun nəvəsinin milyonlarla dollar dəyərində maşın kolleksiyasının olduğunu gördük.

Hələ bu, sərvətlərinin çox az bir hissəsidir. Ümumiyyətlə, burada, sadəcə olaraq, məmurun nəvəsinin harınlaşmasından söhbət gedir. Əli Həsənovun özü bir zamanlar Azərbaycan ictimaiyyətinə nəsihət, təlim-tərbiyə verirdi ki, mənim övladlarım belədir, elədir. Axırı gördük nələr çıxdığını. 21 yaşında uşağın 5-6 milyonluq maşın kolleksiyasının olması kiçik məsələ deyil. İndi də vurub 2 nəfəri öldürdü, həbsxanada komfort həyat yaşayır. Burada söhbət baş nazirin müavini Əli Həsənovdan gedir. Əli Həsənov dövlət tərəfindən Azərbaycanın məcburi köçkünlərinə ayrılan pulları mənimsəyib. Bu adamın Sumqayıtda onlarla mənzili var. Bir generalın oğlu hansısa sürücüyə sillə vurdu və dərhal atası vəzifədən kənarlaşdırıldı. O zaman bəs niyə Əli Həsənov vəzifədən getməməlidir? Nə üçün bu adam nəvəsinin sahib olduğu pullara görə hesabat verməməlidir? Bu məsələlər çox ciddidir. Biz yalnız dövlət başçımızı qorumalıyıq. Çünki dövlətin atributu onun başçısıdır. Yoxsa biz daha durub hökumətin üzvlərini qorumamalıyıq. Onların əksəriyyəti korrupsionerdir. Hansını tərpədirsənsə, altlarından milyonlarla dollar, tonlarla qızıl çıxır. Bizim bəzi yoldaşlar dövlətlə hökuməti qarışdırırlar. Baxın, Tağı Əhmədov milyonları yedi, indi də cəzasız ortalıqda gəzir. Eldar Mahmudovla Ziya Məmmədov da onun kimi. Ziya Məmmədov faktiki olaraq milyardları yığdı, indi də aparıb Milli Şuranı maliyyələşdirir. Yaxşı, bunları kənara qoyaq, bəs 70 yaşlı Əli Həsənov niyə vəzifədə qalmalıdır bu qədər hadisədən sonra? İkinci tərəfdən də, bu adam hələ Yeni Azərbaycan Partiyasında da müavin vəzifəsindədir. Heç olmasa, ölkə ictimaiyyətinə hörmət edib, istefa versin. Onun nəvəsini kukla kimi təcridxanada kondisionerli otaqda oturtmağın nə mənası var? Sabah da hansısa adla məhkəmədən azad edəcəklər".


H.Hacıyev hesab edir ki, xalqın arasında Əli Həsənova qarşı çox böyük qəzəb var: “Bu adama xalq arasında nifrət var. Sosial şəbəkələrdə də onunla bağlı müxtəlif fikirlər gəzir ki, bunlar da nəzərə alınmalıdır. Bu adam şəhərciklərdə məcburi köçkün olmayan şəxslərə evlər paylayıb. Sahib olduğu evləri yataqxanalarda yaşayan məcburi köçkünlərə verməlidir. Bu adamın işi ciddi şəkildə yoxlanılmalıdır. Vaxtilə Əli Həsənov mərhum prezident Heydər Əliyevə də xəyanət edib. Onun Azərbaycana gəlməsini istəməyib. İndi nə oldu, belələri vəzifədədir, bu yolda can qoyan bizim kimilər də dilənir. Bunların hamısını nəzərə aldıqda deyə bilərik ki, Əli Həsənov bir gün də olsun vəzifədə qalmamalıdır. Qaçqınlara ayrılan milyardlarla pulun əksəriyyəti bu adamın cibində, bank hesablarında, qohumlarındadır”.


Vilyam Hacıyevin təltif olunması barəsində H. Hacıyev aşağıdakıları söylədi: “Vilyam mənim atamın əmisi oğludur. Onun vətənə hansısa xidmət etməyini görməmişəm. Əgər ölkə başçısı ona orden verilməsini münasib bilibsə, buna qarışmaq bizə düşməz. Görünür, belə məsləhət bilinib. Vilyama ordeni mənim xətrimə veriblər. Yoxsa onun elə bir hörməti yoxdur. Mənim xidmətlərimə görə Vilyam orden alıb”.


H.Hacıyev onu da qeyd edib ki, partiya olaraq ciddi şəkildə prezident seçkilərinə hazırlaşırlar:


“Çox ciddi hazırlaşırıq. Ancaq bir məsələni qeyd edim ki, bizim üçün önəmli olan əsas məsələ dövlətin müstəqilliyi, varlığıdır. Ona görə də seçkilərə tam hazırlığa start vermişik. Müavinlərimiz rayonlara gedir, özüm partiya üzvləri ilə görüşlər keçirirəm. Artıq təbliğat işlərini qurmuşuq. Partiyanın rəhbərliyi yayın qızmar günündə belə insanların içərisində olub, onlarla söhbətlər aparıb. Arzu edərdim ki, rəqiblərim daha güclü olsun və eyni zamanda milliyyət baxımından qarışıqları olmasın”.