Deputatın biznesi üçün təhlükə yaranmayıb ki?

Bu yaxınlarda bütün ölkə mətbuatının gündəminə 53 il siqaret çəkməsi haqqında etirafı və tütün məmulatlarının reklamına qarşı sərt bəyanatları ilə deputat Mahir Aslanov gəldi.

Deputatın Milli Məclisdəki bu çıxışı müxtəlif media qurumlarında müzakirə olundu və hətta bəzi jurnalistlər sosial şəbəkələrdə onun Milli Məclisdə son 6 ildə cəmi 1 dəfə, onda da siqaret haqqında danışdığını qeyd etdilər.

365info.az M.Aslanovla bağlı bir sıra məlumatlar əldə edib, lakin ilk əvvəl oxuculara ölkə mətbuatından bəzi çıxarışları xatırlatmaq istərdik. M.Aslanov yalnız siqaret məsələsində həssaslığı ilə mətbuatın gündəminə gəlmir.Belə ki, Goranboyun millət vəkilinin adı tikinti, mebel, logistika, klub-restoran biznesində də hallanır.

Məsələn, dia.az saytında 2015-ci ildə yayımlanmış bir məqalədə deyilir: “ Deputatın özündə bir çox sahəni birləşdirən nəhəng biznes şəbəkəsinə sahib olduğunu vurğulayan məlumatlı şəxsin sözlərinə görə, Mahir Aslanova məxsus olan “Kəpəz Group” tikintidən tutmuş, mebel satışına qədər bir çox fərqli sahəni əhatə edir: “Bu şirkət 1992-ci ildə fəaliyyətə başlayıb. “Kəpəz Group” tikinti, mebel (istehsalı və daşınması), daşımaçılıq, restoran (klub), mehmanxana biznesi, həmçinin, təmir və dizaynlaşdırma sahələrində fəaliyyət göstərir. Şirkət hazırda Almaniya, Türkiyə, Birləşmiş Ərəb Əmirliyi, Gürcüstan, Rusiya və Rumıniya ilə güclü əlaqələr qurub. Bundan başqa, Mahir Aslanovun onlarla iri yük daşımaçılığı ilə məşğul olan TIR-ları var.

İnqilab küçəsində yerləşən “Kəpəz Mebel Evi”, “Kəpəz” otel və “Happy İnn” otellər şəbəkəsi də ona məxsusdur. Eyni zamanda, millət vəkilinin paytaxtın müxtəlif ərazilərində bir neçə hündürmərtəbəli binası var”. Deputatın oğlu Məhəmmədəli Aslanovun “Bank of Azerbaijan”ın Müşahidə Şurasına rəhbərlik etdiyini deyən məlumatlı şəxsin iddiasına görə, Mahir Aslanovun oğlu əvvəllər “Bank Technique” ASC-də mühüm postda təmsil olunub: “Deputatın digər oğlu Famil Aslanov isə hüquq-mühafizə orqanlarında çalışır. Lakin buna baxmayaraq, o, bu ilin yanvar ayında idarə etdiyi 10 GV 888 dövlət nömrə nişanlı “Maserati” markalı avtomobili ilə yol hərəkət qaydalarını pozduğu üçün saxlanılıb. Nəticədə onun maşını Badamdarda yerləşən cərimə meydançasına aparılıb. Mahir Aslanovun biznes imperiyasına gəlincə, bu barədə deyilir ki, deputatın Nəsimi rayonu Abbas Səhhət küçəsində yerləşən “Happy İnn” oteli bəzi idarə, təşkilat və müəssisələrin pul “yuduqları” otel kimi tanınır. Bu otel hər zaman müştəri bolluğu ilə seçilib. Ölkəmizə gələn qonaqlar məhz “Happy İnn” otelinə yerləşdirilirlər. Bir sözlə, əldə olunmuş “razılaşma”ya əsasən ölkəmizə gələn idmançılar və mədəniyyət nümayəndələri bu oteldə məskunlaşırlar” (dia.az).

Həmçinin, M.Aslanovun sabiq baş nazirin müavini Abbas Abbasovla “şəriklik” əlaqələrindən də mətbuatda söz açılır: “Deputatın baş nazirin sabiq 1-ci müavini Abbas Abbasovla da şərikli biznesinin olduğu haqda məlumatlar var. M.Aslanovun Abbas Abbasovun Rumıniyadan ölkəyə gətirdiyi mebellərin satışını həyata keçirdiyi bildirilir. Haqqında yazılanlara münasibətini öyrənmək üçün musavat.com-un əməkdaşı M.Aslanovla telefon əlaqəsi saxlayıb. Deputat deyib ki, seçiciləri onu boykot edib-etmədiyini seçkilər göstərəcək: “Hamı bilir ki, mən kiməm. Mən Abbas Abbasovla bağlı danışmaq istəmirəm. 66 yaşım var, barəmdə kim nə yazır, yazır də. Mənim Abbas Abbasovla tanışlığım belə yoxdur, o ki qalmışdı onunla şərik olam. Heç onun deputat oğlu Aydın müəllimlə də münasibətim, salam-əleykim yoxdur. Baxmayaraq ki, 5 ildir deputatıq. Çox adam çox şey yaza bilər. Mən özümə arxayınam, kim nə istəyir yazsın” (musavat.com).


Məhəmmədəli Aslanovun “Bank of Azerbaijan”ın rəhbərliyinə gətirilməsi ilə bağlı məlumat 2014-cü ildə Lent.Az tərəfindən də yayılmışdı. Qeyd edək ki, bu banka əvvəl “Hafka” ləqəbli Hafiz Məmmədov rəhbərlik edib. Ölkə mətbuatında “Hafka”nın Mahir Aslanovun oğlu ilə əvəzlənməsini “təsadüf” hesab etməyənlər də az deyil. Bəzi saytlarda Mahir Aslanovun nəqliyyat naziri Ziya Məmmədovla sıx əlaqələrindən söz açılsa da, mia.az saytında əksini iddia edən məlumata rastlamaq olar: “Məlumatlı şəxsin sözlərinə görə, hazırda elə bir vəziyyət yaranıb ki, Mahir Aslanovun qudası Hafiz Məmmədova məxsus olan “Bank of Azerbaijan” ASC-də yanvarda bağlanmaq təhlükəsi ilə üzləşib: «Bilirsiniz ki, Mahir Aslanovun kürəkəni də həmin bankda pay sahibidir. Yəni Hafiz Məmmədov bankın səhmlərinin 42,97 faizini oğlanları Kənan və Sənanın adın, 13,31 faizini isə qardaşı Mübariz Məmmədovun adına rəsmiləşdirib” (mia.az).

“Bank of Azerbaijan”da qohumların “yerdəyişməsi” təbii olaraq sual doğura bilər, lakin Mahir Aslanovun digər oğlu Famil Aslanov da mətbuatın diqqətindən kənarda qalmayıb. 2015-ci ilin yanvar ayında bir məlumat yayılmışdı ki, bayram günlərində yüksək səsli siqnallardan istifadə edən və yol-hərəkət qaydalarını pozan Famil Aslanovun “Maserati”si cərimə meydançasına aparılıb: “Avtoxuliqanlıq edən sürücünün 10 GV 888 dövlət nömrə nişanlı “Maserati” markalı bahalı avtomobil isə cərimə meydançasına aparılıb. Həmin avtomobil hazırda Badamdarda yerləşən cərimə meydançasında saxlanılır. AzNews.az belə dəbdəbəli avtomobillə “avtoşluq” edən sürücünün kimliyini araşdırıb. Məlum olub ki, sürücü Famil Mahir oğlu Aslanovdur. Onun iş adamı, Milli Məclisin Aqrar siyasət komitəsinin üzvü Mahir Aslanovun oğlu olduğu müəyyən edilib. Məsələ ilə bağlı sualları cavablandıran millət vəkili Famil adlı oğlunun olduğunu bildirsə də, onun idarə etdiyi “Maserati”nin cərimə meydançasına aparılmasını təsdiqləməyib: “O, orqan işçisidir. Onun qayda pozması və maşınının cərimə meydançasına aparılması inandırıcı deyil. Ancaq hər birimiz qanun qarşısında cavabdehik və bu baxımdan əgər yol hərəkət qaydalarını pozuruqsa, avtomobilimiz cərimə meydançasına aparıla bilər” (aznews.az).


365info.az oxuculara aydınlıq gətirmək üçün bildirir ki, həmin vaxtda Famil Aslanov MTN-in Nəsimi Rayon İdarəsində rəis müavini olub. Onun “Maserati”si və avtoxuliqanlığı haqqında isə elə də geniş informasiyalar sızmayıb və ya… Təbii ki, MTN-in vəzifəli zabiti barəsində çox da müzakirə aparıla bilməzdi. Həmçinin “Happy İnn” otelinin Nəsimi rayon ərazisində yerləşməsi də, Mahir Aslanovun gücünə “güc qatmış” sayıla bilər.

Lakin mətbuatda belə şayiələr də gəzir ki, Mahir Aslanovun bu və digər işləri elə onun MTN-çi oğlunun nəzarətində olub. O dərəcədə ki, yaxın zamanlara qədər Mahir Aslanova zəng edənlər onun özü ilə yox, Famil Aslanovla danışmalı olublar. Hazırda isə MTN-çi oğlun harda olduğu bilinmir. Bəzi şayiələrə görə, Famil Aslanov atasının bəzi əlaqələrinin sayəsində cinayət araşdırmalarından kənarda qalaraq, bizneslə məşğul olur… Eləcə də, onun tez-tez xaricə gedib-gəldiyi, yaxın zamanlarda Avropaya köçüb orda “əsaslanacağı” barədə məlumatlar gəzir. Lakin təhlükəsizlik orqanı əməkdaşının, həm də rəis müavini işləmiş birinin Avropada yaşayış icazəsi alması üçün, əlbəttə, bir sıra “prosedurlar” və “çətinliklər” ola bilər. Digər tərəfdən, Famil Aslanov özüylə Avropaya puldan başqa, daha nələr aparmaq niyyətindədir? Bu və digər suallara aydınlıq gətiriləcəyinə ümid edirik.