O, bu bəyanatı Ağ Evdəki qalmaqaldan sonra ABŞ Prezidenti Trampın ətrafından gələn açıqlamalara cavab olaraq verib. Avropalı müttəfiqləri ilə Londonda görüşdükdən sonra Zelenski bildirib ki, prezident seçkiləri keçirildiyi təqdirdə yenidən namizədliyini irəli sürəcək. Buna görə də, onu əvəz etməyin asan olmayacağını deyib.
ABŞ Nümayəndələr Palatasında respublikaçıların lideri Conson NBC kanalına açıqlamasında Zelenskinin ya reallığı qəbul edib danışıqlar masasına qayıtmalı, ya da Ukraynanı başqa birinin idarə etməli olduğunu söyləyib. Trampın təhlükəsizlik müşaviri Valtz isə CNN-ə bənzər ifadələr işlədib.
Ukrayna Konstitusiyası hərbi vəziyyət şəraitində seçkilərin keçirilməsini qadağan edir. Buna görə də, Zelenskinin keçən il başa çatan rəsmi prezidentlik müddətinə baxmayaraq, onun legitimliyi davam edir. Lakin o, bir daha vurğulayıb ki, əgər Ukrayna NATO-ya üzv qəbul edilərsə, istefa verməyə hazırdır.

Sarvan Səmədoğlu
TEREF