NASA-nın keçmiş astronavtı Nikol Skott, Beynəlxalq Kosmik Stansiyada (BKS) çalışarkən müşahidə etdiyi qeyri-adi hadisələri və yadplanetlilərin mövcudluğu ilə bağlı fikirlərini bölüşüb. O etiraf edib ki, uçan naməlum obyektlərlə (UNO) birbaşa qarşılaşması olmayıb, amma bəzi anlar onu heyrətləndirib.

Bu barədə o, "LADbible Stories" "YouTube" kanalına verdiyi müsahibədə danışıb.

Onun sözlərinə görə, ilk dəfə meteor görəndə bunu UNO hesab edib.

"Ayaqlarımın altından meteoritlər keçirdi. Bu çox möhtəşəm idi. Amma ilk dəfə onları görəndə mən belə dedim: "Aman Allahım, bu nə idi?" Tez digər modullardakı həmkarlarımın yanına qaçdım və həyəcanla qışqırdım: "Mən indicə bir şey gördüm, aşağıda parlaq bir şey uçub keçdi!"

Ekipaj üzvləri bunun ehtimal ki, atmosferdə yanaraq yoxa çıxan kosmik tullantı olduğunu izah ediblər. Astronavtın sözlərinə görə, ümumiyyətlə ona tez-tez yadplanetlilərlə rastlaşıb-rastlaşmadığı sualı verilir. Skott onlarla qarşılaşmağı çox istədiyini vurğulayıb.

Qeyd edək ki, NASA astronavtı 2009 və 2011-ci illərdə iki dəfə BKS-ə uçub və ümumilikdə 103 gün orbitdə olub.