Texas ştatının Ostin şəhərində Hədəf (Target) mağazasının yaxınlığında baş verən silahlı insident nəticəsində biri uşaq olmaqla üç nəfər həlak olub. Polis hadisədən sonra şübhəlini saxlayıb.
Ajans.az Associated Press-ə istinadən xəbər verir ki, faciə avqustun 11-də mağazanın dayanacağında baş verib. Silahlı şəxs iki böyüklə yanaşı bir uşağı da güllələyərək öldürüb.

Hadisədən sonra şübhəli şəxs iki avtomobili oğurlayaraq qaçıb — əvvəlcə birini zorla ələ keçirib, daha sonra isə avtosalondan başqa bir avtomobili götürüb. Polis onu hadisə yerindən təxminən 32 km uzaqda tazer tətbiq edərək saxlayıb.

Ostin polis rəisi Lisa Davis bildirib ki, saxlanılan şəxs təxminən 30 yaşındadır və keçmişində psixi pozuntular olub. Hazırda cinayətin motivləri araşdırılır.

Polis əməkdaşları hadisə yerində güllə yarası almış üç nəfəri aşkarlayıb — ikisi yerindəcə ölüb, üçüncüsü isə xəstəxanaya aparılarkən yolda dünyasını dəyişib. Dördüncü şəxsə tibbi yardım göstərilib, lakin onun xəsarətləri atışma ilə bağlı olmayıb.

Atışma məktəb alış-veriş mövsümünün qızğın vaxtına təsadüf edib və yerli icma üçün xüsusilə ağır zərbə olub. Mağaza rəhbərliyi həlak olanların ailələrinə başsağlığı verib və əməkdaşlara psixoloji dəstək göstəriləcəyini açıqlayıb:

“Qəlbimiz bu faciədən əziyyət çəkənlərlədir”, – bəyanatda bildirilib.

Lisa Davis isə hadisəni belə şərh edib:

“Bu, Ostin üçün çox kədərli bir gündür. Qurbanların ailələrinə dərin hüznlə başsağlığı verirəm.”

İstintaq davam edir, polis cinayətin bütün hallarını müəyyən etməyə çalışır.