Rusiyanın Kamçatka diyarında 5.2 və 5.5 maqnitudalı zəlzələlər baş verib.

Bu barədə Rusiya Elmlər Akademiyasının Vahid Geofizika Xidmətinin Kamçatka filialı məlumat yayıb.

Məlumata görə, birinci zəlzələnin ocağı 11.7 km dərinlikdə yerləşib və Petropavlovsk-Kamçatsk şəhərindən 225 km məsafədə qeydə alınıb. İkinci zəlzələnin ocağı isə 8.5 km dərinlikdə yerləşib.

Bundan əlavə, Kamçatkadakı Klyuçevskaya Sopka vulkanının püskürməsi nəticəsində sovrulan kül buludu 10 km-dək yüksəlib.

Xatırladaq ki, iyulun 30-da yerli vaxtla saat 11:24-də (Bakı vaxtı ilə 3:24) Sakit okeanda Kamçatka yaxınlığında 8.7 bal gücündə zəlzələ baş verib. Təkanların episentri Petropavlovsk-Kamçatskdan 161 km şərqdə, 32 km dərinlikdə yerləşib. Zəlzələdən sonra çox sayda afterşok qeydə alınıb.