Azərbaycanın işğal altındakı torpaqlarında hava hücumundan həyəcan siqnalı verilib.

Moderator.az-ın Rusiya mediasına istinadla verdiyi xəbərə görə, dünən –avqustun 24-ü, yerli vaxtla saat 11:00-da Xankəndində, Şuşada, Laçında, Kəlbəcərdə və ermənilərin zəbt etdiyi digər yaşayış məntəqələrimizdə sirena siqnalları səslənib.

Qondarma separatçı rejimin fövqəladə hallara cavabdeh olan qanunsuz qurumu tərəfindən səsgücləndiricilər vasitəsilə hava hücumundan mülki müdafiə təlimləri keçirilməsi barədə elan verilib. Ermənilər Azərbaycanın gözlənilən hava hücumu zamanı evdə, işdə, küçədə, nəqliyyatda və s. necə davranmaq haqda bir neçə gün öncə internet saytları, “sms”-lər vasitəsilə təlimatlandırılıb. Təlimlər yarım saat sonra “həyəcan siqnalına son” komandası ilə bitib…

Təlimlər zamanı böyüklərlə yanaşı, bağçalardakı uşaqlar da sığınacaqlara toplanmağı məşq ediblər. 20-30 yaşlılar nisbətən həyəcanlansa da, 1990-cı illərdə Azərbaycan aviasiyasının gerçək hücumlarının şahidi olmuş 40-70 yaşlı ermənilər bunu təbii qəbul edib. Yaşlı qadınlardan bəziləri mediaya açıqlamasında bildirib ki, 1-ci Qarabağ savaşından fərqli olaraq biz artıq aviahücumlardan və s. qorxmuruq. “Çünki bizim ordumuz, hava hücumundan müdafiə qüvvələrimiz var”…

P.S. Görünür, ermənilər cəmi iki il öncə Aprel savaşı zamanı yaşadıqları həyəcanı, qaçhaqaçı unudublar…
İlan ulduz görməyincə ölmədiyi kimi, ermənilər də Azərbaycan Silahlı Qüvvələrinin, o cümlədən aviasiyasının gerçək gücünü görməyincə dövlətimizin qanunlarına tabe olaraq onun adi vətəndaşı kimi yaşamaq, yaxud torpaqlarımızı tərk etmək haqda düşünməyəcək…