Rauf Rəcəbov İTV-dən uzaqlaşdırıldı – “Təmizləmə” davam edir
15-08-2018, 17:57
İTV-nin Gənclər, Elm və Təhsil Departamentinin direktoru Rauf Rəcəbov işdən çıxarılıb.
BakuPost-un məlumatına görə, onun işdən azad olunması ilə bağlı ərizəsi bir neçə gün əvvəl alınıb.
Xəbərə görə, İTV-nin yeni rəhbəri Balakişi Qasımovun göstərişi ilə R.Rəcəbovla yanaşı bir neçə nəfər də vəzifəsini itirib.
Qeyd edək ki, Rauf Rəcəbov 2005-2011-ci illərdə İctimai Televiziya və Radio Yayımları Şirkətinin Milli Azlıqlar ücün Verilişlər Departamentinin direktoru vəzifəsində çalışıb. 2011-2013-cü illərdə İctimai Televiziyanın "Carcıfilm" Yaradıcılıq Birliyinin direktor müavini və Baş redaktoru olub.
2013-2015-ci illərdə İctimai Televiziyanın Səhər Proqramları Departamentinin direktoru vəzifəsində çalışıb. 2016-cı ilin yanvar-iyun aylarında İctimai Televiziyanın "Carcıfilm" Yaradıcılıq Birliyinin direktor müavini, iyun-sentyabr aylarında isə İctimai Televiziya və Radio Yayımları Şirkətinin İnformasiya Departamentinin direktoru vəzifəsində çalışıb.
2016-cı ilin sentyabr ayından 2017-ci ilin iyun ayınadək İctimai Televiziyanın "Carcıfilm" Yaradıcılıq Birliyinin direktoru olub.
2017-ci ilin iyun ayından İctimai Televiziya və Radio Yayımları Şirkətinin Gənclər, Elm və Təhsil Departamentinin direktoru, eyni zamanda İTV-də yayımlanan "Sənədli Detektiv" verilişinin müəllifi və aparıcısı olub.
