Həddən artıq soyuq temperatur və qarla müşayiət olunan güclü külək cümə axşamı Avropanın şimal bölgələrinə böyük zərər verərək, minlərlə insanı işıqsız qoyub, magistral yollarda saatlarla tıxaclara səbəb olub.

Almaniya, Fransa və Niderlandda son iki həftə ərzində yağan davamlı leysan yağışları daşqınların müşahidə olunduğu bölgələrdə yenidən daşqınlar yaradıb. Fransada bir nəfərin öldüyü bildirilib.

Şimal regionu boyunca dərin donmalar səbəbindən magistral və əsas yolların bağlandığı, dəmir yolu xidmətində də problemlər olduğu bildirilib.

İsveç ictimai radiosunun məlumatına görə, temperaturun mənfi 38 dərəcəyə endiyi bu Arktik ölkədə təxminən 4 min evdə elektrik enerjisi kəsilib. Ölkənin cənub bölgəsində sürücülər avtomobillərində ilişib qalıb və ya yaxınlıqdakı idman kompleksinə təxliyə edilib.

Qonşu Danimarkada polis ölkənin şimal və qərb hissələrini külək və qar vurduğu üçün sürücüləri lazımsız səfərlərdən çəkinməyə çağırıb.

Finlandiyanın Laplandiyasında, Norveç və İsveçlə sərhəddə yerləşən Enontekyo bələdiyyəsi cümə axşamı ölkədə bu qışın ən aşağı temperaturunu - mənfi 43,1 dərəcə olduğunu qeyd edib. Meteoroloqlar həftənin sonu üçün daha da soyuq temperaturun olacağını proqnozlaşdırıb.

Almaniyada son iki həftə ərzində davamlı daşqınların müşahidə olunduğu bölgələrdə yenidən güclü yağışlar başlayıb. Kansler Olaf Şholz şəhərindəki bəndi və qum torbaları doldurma qurğusunu yoxlamaq üçün bu həftə ikinci dəfə ölkənin şərqindəki Zangerhausen şəhərinə səfər edib.

Bir neçə gün davam edən güclü yağışlardan sonra cümə axşamı Fransanın şimalındakı bir neçə şəhər suyun altında qalıb. Son günlər həmin ərazilərdən yüzlərlə insan təxliyə edilib. Ərazi noyabr və dekabr aylarında da daşqınlara məruz qalmışdı və bəzi şəhərlər hələ də bərpa olunmayıb.