ABŞ administrasiyası HƏMAS hərəkatının təkliflərini, o cümlədən İsraillə ən azı beş il atəşkəsin təmin edilməsi istəyini rədd edib.

HƏMAS Siyasi Bürosunun üzvü Xəlil əl-Hayyanın "Associated Press"ə verdiyi müsahibədə səsləndirdiyi bu fikirləri şərh edən Ağ Evin Milli Təhlükəsizlik Şurasının (MTŞ) strateji kommunikasiyalar üzrə koordinatoru Con Kirbi Vaşinqtonun danışıqlara hazır olmadığını təsdiqləyib.

Kirbi Vaşinqtondan Nyu-Yorka səfər edərkən ABŞ prezidenti Co Baydenin təyyarəsində jurnalistlərə verdiyi açıqlamada deyib: "HƏMAS-ın nəzarəti altında heç bir Fələstin dövləti olmayacaq. Bu, terror təşkilatıdır".

Eyni zamanda, Ağ Ev nümayəndəsi əmin edib ki, Vaşinqton hələ də tamhüquqlu müstəqil Fələstin dövlətinin yaradılması və onun İsraillə dinc yanaşı yaşaması vasitəsilə Yaxın Şərqdəki münaqişənin həllinə çalışır: "Biz iki dövlətli həllin tərəfdarıyıq. Lakin buna münaqişə tərəfləri arasında birbaşa danışıqlar yolu ilə nail olmaq lazımdır".