ABŞ Müdafiə naziri Lloyd Austin cümə günü Konqresin Ukrayna, İsrail və Hind-Sakit Okean regionu üçün vəsaitlərin daxil olduğu yardım paketini qəbul etməsindən sonra Ukraynanın müdafiəsi üzrə təmas qrupunun virtual iclasını keçirəcək.

"Biz təmas qrupuna yeni enerji və təkanla gedirik. Əlavə maliyyə vəsaitini qəbul etməklə Birləşmiş Ştatlar Ukraynanı dəstəkləməkdə liderlik rolunu bir daha təsdiqlədi və eyni zamanda, biz öz liderlik rollarını yerinə yetirən müttəfiq və tərəfdaşlarımıza hörmətlə yanaşırıq" – deyə, Pentaqonun yüksək rütbəli rəsmisi qarşıdan gələn görüşü şərh edib.

Yekun əlavə maliyyələşdirmə qanun layihəsinə Ukraynaya 60 milyard dollardan çox yardım daxildir.

Pentaqon prezidentin qanunu imzalamasından qısa müddət sonra ilk yardımın göndərildiyini elan edib.

Dəyəri 1 milyard dollara qədər olan paket Ukraynaya döyüş meydanında təşəbbüsü bərpa etməyə imkan vermək məqsədi daşıyır. Buraya hava hücumundan müdafiə vasitələri, artilleriya mərmiləri, zirehli texnikalar və tank əleyhinə silahlar daxildir.

Söhbət 2021-ci ilin avqustundan bəri Pentaqonun Ukrayna üçün silah anbarından 56-cı sursatın çıxarılmasından gedir.

Təmas qrupunun gözlənilən görüşündən öncə yuxarıda qeyd olunan Pentaqon rəsmisi bildirib ki, yeni paket geniş koalisiyadan Ukraynaya yardım axınına qoşulacaq.

"Təmas qrupunun üzvləri 2022-ci ilin fevral ayından bəri birlikdə 89 milyard dollar təhlükəsizlik yardımı ayırmağı öhdələrinə götürüblər", rəsmi deyib.

"Son həftələrdə müttəfiqlərin və tərəfdaşların öz üzərinə düşəni etməyə davam etdiyini gördük. Məsələn, Çexiya üçüncü ölkələrdən yüz minlərlə artilleriya mərmisi almaq təşəbbüsü ilə çıxış edib. Almaniya daha bir Patriot sistemi vermək qərarına gəlib və çox ehtiyac duyulan hava hücumundan müdafiə imkanlarını bağışlamaq təşəbbüsü ilə çıxış edib. Böyük Britaniya indiyədək ən böyük hərbi yardım paketini elan edir" – deyə, o qeyd edib.

Bir neçə müttəfiq də Ukrayna ilə uzunmüddətli ikitərəfli təhlükəsizlik sazişləri imzalayıb və bu, koalisiyanın Ukraynanın gələcək uğurlarına sadiq olduğuna işarədir.

"Nazir Ostin Təmas qrupunu ilk dəfə bir araya gətirəndə dedi ki, bu, birləşmiş dünyanı əks etdirir. İki il keçsə də, vəziyyət hələ də belədir " – deyə, Pentaqon rəsmisi qarşıdakı görüşü şərh edərkən vurğulayıb.