"UnitedHealth Group"un (UNH) səhmləri cümə günü bazar açılmamışdan əvvəl kəskin şəkildə bahalaşıb.

Buna səbəb Uorren Baffetə (Warren Buffett) məxsus "Berkshire Hathaway" (BRK-B, BRK-A) investisiya şirkətinin bu sığorta nəhəngində pay aldığını açıqlaması olub.

Tənzimləyici sənədlərə əsasən, "Berkshire Hathaway" ötən rübdə "UnitedHealth"dan təxminən 5 milyon səhm alıb. Bu payın dəyəri təxminən 1,57 milyard dollar olaraq qiymətləndirilir.

Qeyd edək ki, Baffet altı onillikdən sonra bu ilin sonunda "Berkshire Hathaway"in baş direktoru vəzifəsindən istefa verməyi planlaşdırır. Onun investisiya qərarları tez-tez digər investorlar tərəfindən izlənilir və şirkətin hər rüblük hesabatları diqqətlə təhlil olunur.

Sənədlərdə bu investisiya qərarını konkret olaraq "Berkshire"də kimin verdiyi göstərilməyib. Baffetlə yanaşı, şirkətdə səhmləri idarə edən digər şəxslər arasında "Geico"nun baş direktoru Todd Kombs (Todd Combs) və Ted Veşler (Ted Weschler) də var. Onlar adətən daha kiçik portfelləri idarə edirlər.

Qeyd edək ki, "Berkshire Hathaway" yalnız səhmlərə deyil, müxtəlif sahələrdə fəaliyyət göstərən onlarca şirkətə sahibdir. Bunlara "Geico" sığorta şirkəti, "BNSF" dəmir yolu, böyük enerji şirkətləri, istehsal və pərakəndə satış müəssisələri daxildir. "See’s Candy" və "Dairy Queen" kimi tanınmış brendlər də bu holdinqə məxsusdur.

Son dövrlərdə "UnitedHealth" bir sıra çətinliklərlə üzləşib. Keçən ay şirkət bazarda lider mövqedə olan "Medicare" proqramı ilə bağlı federal cinayət və mülki araşdırmalarda əməkdaşlıq etdiyini açıqlayıb.

Şirkət bildirib ki, mediada yayılan məlumatları nəzərdən keçirdikdən sonra ABŞ Ədliyyə Departamentinə öz təşəbbüsü ilə müraciət edib. Bu məlumatlarda şirkətin müəyyən fəaliyyətləri ilə bağlı araşdırmalardan bəhs olunurdu.

Bu ilin əvvəlində "The Wall Street Journal" yazmışdı ki, federal rəsmilər şirkətin "Medicare Advantage" planları çərçivəsində diaqnozların qeydə alınma qaydası ilə bağlı mülki fırıldaqçılıq araşdırmasına başlayıblar. Bu planlar əsasən 65 yaşdan yuxarı şəxslər üçün nəzərdə tutulmuş dövlət "Medicare" proqramının özəl versiyasıdır.

"UnitedHealthcare" brendi ilə fəaliyyət göstərən bölmə 8 milyondan çox insanı əhatə edir və ölkədə ən böyük "Medicare Advantage" təminatçısıdır. Son rüblərdə tibbi xidmətlərin artması və tarif azalmaları bu sahədə təzyiqləri artırıb.

Qəzetin fevral ayında yaydığı məlumata görə, araşdırma son aylardakı hesablaşma təcrübələrinə fokuslanıb. Daha sonra federal cinayətkar səhiyyə fırıldaqçılığı bölməsi şirkətin daha yüksək ödənişlər əldə etmək üçün həkim və tibb bacılarından necə istifadə etdiyini araşdırmağa başlayıb.

"UnitedHealth Group Inc." ABŞ-da ən böyük səhiyyə sığortası və aptek xidmətləri idarəetmə şirkətlərindən biridir. Şirkət eyni zamanda tibbi xidmət və texnologiya sahələrində fəaliyyət göstərən "Optum" adlı sürətlə böyüyən bölməyə də sahibdir.

Şirkətin səhmləri ötən ilin dekabrından bəri dəyər itirir. Həmin vaxt "UnitedHealthcare"in baş direktoru Brayan Tompson (Brian Thompson) Manhettendə keçirilən illik investor görüşünə gedərkən odlu silahla qətlə yetirilmişdi. Hadisə ilə bağlı Luigi Mançione (Luigi Mancione) adlı şəxsə ittiham irəli sürülüb.

Aprel ayında səhmlər bir daha dəyər itirib, çünki şirkət tibbi xidmətlərə tələbatın artması səbəbilə gələcək proqnozunu aşağı salmışdı. Bir ay sonra isə keçmiş baş direktor Endryu Vitti (Andrew Witty) istefa verib və şirkət ümumiyyətlə maliyyə proqnozlarını geri çəkib. Səbəb kimi yeni "Medicare Advantage" üzvləri üzrə gözləniləndən daha yüksək tibbi xərclər göstərilib.

Cümə günü səhmlər bazar açılmamışdan əvvəl 12 faizdən çox bahalaşıb. Lakin buna baxmayaraq, şirkətin səhmləri son bir ildə dəyərinin təxminən yarısını itirib.