Son günlər ölkə gündəmini zəbt edən və böyük etirazlara səbəb olan əsasən iki məsələ var: üç xanımın çılpaq video-görüntüsü və narkomaniyanı təbliğ edən meyxana. Hər iki mövzu da mediada geninə-boluna müzakirəyə çıxarıldı. Saytlar azyaşlı qızların videolarını, intim görüntüsü yayılan xanımların fotolarını yayımladılar. Bəs, medianın bu məsələlərdə sərgilədiyi mövqe doğrudurmu, etikdirmi, əxlaqidirmi?

BakuPost bu suallarla Mətbuat Şurası sədrinin müavini, Jurnalistlərin Həmkarlar İttifaqının sədri Müşfiq Ələsgərliyə müraciət edib.

M.Ələsgərli bildirib ki, hər iki mövzunun mətbuatda yayılması ictimai davranış və əxlaq normalarına ziddir. Digər tərəfdən, özəl həyatın toxunulmazlıq prinsipi pozulub.

Sədr müavini, həmçinin, qeyd edib ki, xəbər istehsalçıları qanunlarla yanaşı, etik çərçivədə fəaliyyət göstərirlər: "Jurnalistlərin peşə kodeksinə əməl olunmasına Mətbuat Şurası nəzarət edir, monitorinqlər aparır və münasibətini bildirir. Əslində, peşəkar jurnalistlər bütün bunları bilir. Görünür, bu videonu yayanlar peşəkar deyil”.

MŞ rəsmisinin sözlərinə görə, videoçarxlar yayılan kimi sədri, millət vəkili Əflatun Amaşov dərhal məsələyə münasibət bildirib, baş vermiş hər iki hadisəni qanun pozuntusu adlandırıb: "Biz tənzimləmə qurumu olaraq, öz üzərimizə düşən işi yerinə yetiririk ki, gələcəkdə bu kimi hallar vaş verməsin. Neqativ hallar olanda xəbərdarlıq edir və bəyanatlar, açıqlamalar veririk”.
Teref.az -dan qeyd: Görəsən MŞ-nın fikrincə jurnalist kimdir, rəsmi mövqeni yayanlarmı?