Moskvada Müdafiə Nazirliyinin baş qərargahının damında olan “Pantsir-S1” Rusiya paytaxtına hücum edən pilotsuz təyyarəni 300 metrdən də az məsafədə vura bilməyib.

Bu barədə “Azadlıq” radiosunun rus xidməti yazıb. Sosial şəbəkələrdəki şərhlər və peyk görüntüləri 2022-ci ilin sonunda Müdafiə Nazirliyinin qərargahının damında yerləşdirilən “Pantsir-S1” qısa mənzilli zenit-raket kompleksinin hələ də orada olduğunu təsdiqləyir.

Eyni zamanda, Rusiyanın Teleqram kanallarının qeyd etdiyi kimi, bugünkü hücum zamanı pilotsuz uçuş aparatı “Komsomolski prospekti-18” ünvanında yerləşən Müdafiə Nazirliyinin binaları kompleksinə düşüb.

Bu nöqtə “Pantsir-S1”in yerləşdiyi yerdən 300 metrdən də az məsafədə yerləşir. “Azadlıq Radiosu” iddia edir ki, şahidlər bazar ertəsi səhər “Pantsir”in işinə dair heç bir dəlil görməyiblər.