Hər il olduğu kimi, 2023-cü ildə də yaşadığımız planetdə bir sıra təbii və digər fəlakətlər baş verib. Cari ildə bir çox ölkələr zəlzələ, quraqlıq, tufan və digər təbii fəlakətlərdən əziyyət çəkib.

Bizim.Media 2023-cü ildə baş verən təbii fəlakətləri və onların acı nəticələrini araşdırıb.

Ölənlərin sayı yüzminlərlədir

Təbii fəlakət baxımından rekord ABŞ-a məxsusdur. 2023-cü ildə ABŞ-da 23 təbii fəlakət qeydə alınıb. Bu il ABŞ-ı bürümüş fəlakətlər sırasına Havay adalarındakı yanğınlar, Kaliforniyadakı daşqınlar, Floridadakı İdalia qasırğası, Qərb sahilindəki Hillari fırtınası və digərləri daxildir. Ümumilikdə, ABŞ-da 253 nəfər təbii fəlakətlərin qurbanı olub və dəyən ziyan 57,6 milyard dollar təşkil edib.

Əfqanıstanda 10-17 yanvar arasında davam edən kəskin şaxtalı hava 166 insanın ölümünə səbəb oldu.

Fevralın 6-da Türkiyənin Kahramanmaraş vilayətində baş verən 7,7 və 7,6 bal gücündə iki zəlzələ ölkənin 11 vilayətinə təsir edib.

Nəticədə Türkiyə və Suriyada 60 minə yaxın insan həyatını itirib.

Afrikanın cənub-şərqini bürüyən Freddi siklonu təxminən 1400 insanın ölümünə səbəb olub. Fevral ayında baş qaldıran siklon ən uzun müddət - 38 gün davam edib. 8000 km-dən çox məsafə qət edən siklon Mavriki, Madaqaskar, Malavi və Mozambikə ziyan vurub.

Martın 24-27 arasında ABŞ-ın Alabama və Missisipi ştatlarında 30-dan çox tornado baş verib. Nəticədə 23 nəfər ölüb və 236 nəfər yaralanıb. Ən güclü tornado Missisipi ştatının “Rolling Fork” və “Silver Siti” şəhərlərində baş verib.

Sentyabrın 9-da Mərakeşdə baş vermiş 7 bal gücündə dağıdıcı zəlzələ nəticəsində 2100-dən çox insan həyatını itirib. Təbii fəlakət 2400-dən çox insanın yaralanmasına və böyük dağıntılara səbəb olub.

Ölkəmizdə baş verənlər...

Azərbaycana gəldikdə, 2023-cü ilin bu gününə qədər ölkəmizdə 150-yə yaxın daşqın-sel hadisəsi qeydə alınıb ki, bu da keçən illə müqayisədə 3 dəfə çoxdur. Eyni zamanda, 2023-cü ildə Bakı sakinlərini təşvişə salan, episentri Xəzər dənizində olan iki 5 baldan yuxarı zəlzələ də baş verib.

Belə ki, aprelin 7-də 6 bal, dekabrın 7-də isə 5,6 bal gücündə baş vermiş yeraltı təkanlar paytaxt Bakıda və bir sıra ətraf rayonlarda hiss olunub. Xoşbəxtlikdən zəlzələlər zamanı ölən və yaralananlar, eyni zamanda dağıntı olmayıb.

Mənbə: bizim.media