İncəsənət tarixçiləri Pablo Pikassonun rəsminin 125 illik sirrini açıblar. AzPost xarici mətbuata istinadla xəbər verir ki, Pablo Pikassonun heykəltəraş dostunu təsvir edən rəsmini tədqiq edən sənət tarixçiləri gözlənilmədən şəklin altında nəyin gizləndiyini üzə çıxarıblar. Məlum olub ki, kətan üzərində sirli qadın obrazı var.

Ehtimal olunur ki, Pikasso 1901-ci ildə onun üzərinə heykəltəraş dostu Mateu Fernandez de Sotonun mavi və yaşıl çalarlarda masa arxasında əyləşmiş şəklini çəkərkən əvvəlcədən çəkdiyi qadının portreti itib.

Bununla belə, təxminən 125 il sonra Londondakı Courtauld İncəsənət İnstitutu sərgidən əvvəl infraqırmızı və rentgen şüalarından istifadə edərək rəsm əsərlərini araşdırıb və orijinal portretin konturlarını üzə çıxarıb.

Courtauld Gallery-nin direktor müavini Barnaby Rayt, təsvirin infraqırmızı kamera ilə skan edilməsi üçün mozaikaya bənzər bir üsuldan istifadə edərək, qadının portretinin sözün əsl mənasında parça-parça ortaya çıxdığını ifadə edib.

Mütəxəssislər səthin altında nəsə gizləndiyinə əmin idilər. Çünki fırça vuruşlarının bəziləri Pikassonun dostunun bitmiş portreti ilə heç bir əlaqəsi yox idi.

Qadının şəxsiyyəti hələ müəyyən edilməyib, baxmayaraq ki, o, 1901-ci ildə Parisdə çəkdiyi Pikassonun bir neçə başqa qadın portretlərinə bənzəyir. O, vaxtilə Fransa paytaxtında dəbdə olan eyni xarakterik şinon saç düzümünə malikdir.

Rayt qeyd etdi ki, o, “əbədi anonim qala bilər”. Lakin ekspertlər əsərin qəhrəmanının müəyyənləşdirilməsi üzərində artıq işə başlayıblar.

Xatırladaq ki, Pikasso 1901-ci ildə Parisə gələndə onun cəmi 19 yaşı var idi. Lakin o, artıq öz personajlarını təsvir etmək üçün yeni üsullar tapırdı. Barnaby Rayt qeyd edir ki, bu əvvəlki portretdən imtina edib onun üzərində rəsm çəkməklə Pikasso, yəqin ki, nəinki mövzusunu dəyişdi, həm də üslubunu dəyişdi, məşhur Mavi Dövr rəsm üslubunu inkişaf etdirdi.

Mavi Dövrdə Pikasso əvvəlki impressionist üslubundan uzaqlaşaraq personajlarını təsvir etmək üçün daha tünd rənglərdən istifadə edib. Bu dəyişiklik qismən onun yaxın dostu Karlos Kasagemasın intiharından sonra baş verib.

X-şüaları göstərir ki, Pikasso bu kətanı bəlkə də üç-dörd dəfə yenidən işləyib.