Tsukuba Universiteti və Yaponiyanın Qabaqcıl Sənaye Elmi və Texnologiyaları Milli İnstitutundan olan yapon alimləri günəş aktivliyi, Yerin iqlimi və seysmik aktivlik arasında mümkün əlaqəni müəyyən ediblər.
TEREF Qaynarinfo.az -a istinadla xəbər verir ki, araşdırma "Chaos" elmi jurnalında dərc olunub.
Mütəxəssislər zəlzələlər, günəş aktivliyi və Yer səthinin temperaturu ilə bağlı məlumatları təhlil etmək üçün riyazi və hesablama üsullarından istifadə ediblər. Onlar tapıblar ki, Yer səthinin temperaturu məlumatlarının modellərə daxil edilməsi, xüsusilə dayaz zəlzələlər üçün proqnozun dəqiqliyini artırıb.
Günəş aktivliyi ilə əlaqədar planetin səthinin temperaturunun dəyişməsi süxurların xassələrinə təsir edərək onları daha kövrək və çatlamağa meyilli edir. Bu proseslər həm də yeraltı suların hərəkətini dəyişə bilər ki, bu da öz növbəsində tektonik plitələrin sərhədlərində təzyiqi dəyişə bilər.
Tədqiqat nəticəsində məlum olub ki, günəş istiliyinin Yer səthinə ötürülməsi həqiqətən seysmik aktivliyə cüzi də olsa təsir edə bilər.
Kəşf müəllifləri hesab edirlər ki, günəş aktivliyi proqnozlarının Yerin temperatur modellərinə daxil edilməsi zəlzələlərin proqnozlaşdırılmasının təkmilləşdirilməsi üçün mühüm alət ola bilər.