Ermənistan Baş naziri Nikol Paşinyan hökumətin iclasında Soçi görüşündən danışıb. TEREF.AZ-ın məlumatına görə, baş nazir deyib ki, Soçidə Azərbaycan Prezidenti İlham Əliyev və Rusiyanın dövlət başçısı Vladimir Putinlə keçirilən üçtərəfli görüş regionda sülhün bərqərar edilməsi istiqamətində irəliləyiş olub. O bildirib ki, Ermənistanın Soçi görüşündən əvvəl və ondan sonrakı siyasəti dəyişməzdir. Hökumət başçısı söyləyib ki, Soçidə keçirilən üçtərəfli görüşdə yalnız Praqada əldə olunan razılaşmalar təsdiqlənib: “Biz razılıqları təsdiqləmişik, Rusiya və Azərbaycandan da etiraz olmayıb”. Soçi görüşü Ermənistanın siyasi-ictimai mühitində "İrəvanın növbəti uğursuzluğu" kimi dəyərləndirilir. Məsələn, erməni şərhçi Qraçya Qalustyan deyib ki, Soçi görüşündə imzalanmış sənədin bəzi müddəaları hələ də İrəvan üçün anlaşılan deyil: "Birincisi, artıq hamı bilir ki, sənəddə bir dəfə də olsun “Qarabağ” sözü işlədilməyib. Siz bir düşünün, hətta rus sülməramlıları barədə qeyddə belə “Qarabağ” əvəzinə “sülhməramlıların dislokasiya olduğu ərazi” ifadəsi işlədilib. İndi isə Azərbaycan Prezidenti İlham Əliyevin Rusiya lideri Vladimir Putin ilə görüşü zamanı səsləndirdiyi bir fikrə diqqət yetirək: “Qarabağ məsələsi artıq tarixdir. Bu məsələ 2 il öncə bağlandı”. Aydın olur ki, Bakı bu tezisini sənədə keçirə bildi və bu sənədə İrəvan qol çəkdi".
Politoloq Aleksandr İsgəndəryan da Paşinyanın planlarının baş tutmadığını deyib. Bildirib ki, həm Qərb, həm də Rusiya üçün Azərbaycan və Türkiyənin dəyəri var: "Rusiya və Qərbə Cənubi Qafqazda demək olar ki, eyni şey lazımdır ki, bizim regionda risklər o qədər də böyük olmasın. Ukrayna böhranı fonunda Qafqaz regionunda çox yüksək risklər heç kimə lazım deyil. Azərbaycana təsir alətləri də o qədər çox deyil və böyük dövlətlər Qarabağla o qədər də maraqlanmır. Rusiya deyir ki, gəlin Ermənistanla, Azərbaycanla bağlı bütün problemləri həll edək, Qarabağ məsələsini hələlik təxirə salaq, bu gün həll etməyək. Qərb isə deyir ki, Qarabağ məsələsini indi həll edək. Məsələ hansısa variantla razılaşıb-razılaşmamağımız deyil, kimlərin zamin olacağı və zəmanətin olub-olmayacağıdır".

Millət vəkili Hikmət Babaoğlu "Şərq"ə bildirib ki, Soçidə keçirilən üçtərəfli görüş Ermənistan diplomatiyasının tam fiaskosu ilə başa çatdı. Deputatın sözlərinə görə, Paşinyan ümid etdiyi heç nəyə nail ola bilmədi:

"Ancaq ermənilər hesab edirdilər ki, Soçi görüşü postmüharibə diplomatiyasında dönüş nöqtəsi ola bilər. Necə ki 12-14- sentyabr təxribatı zamanı döyüş meydanında dönüş yarada biləcəklərinə inanmışdılar. Soçi fiaskosu 12-14 sentyabr fiaskosunun diplomatik variantı kimi yadda qaldı. Məsələ ondadır ki, ermənilər görüş öncəsi üç əsas təzyiq mexanizmi əldə etdiklərinə inanırdılar. Bunlardan biri Praqa görüşündən sonra Ermənistana Aİ-nin sülhməramlı missiya göndərməsi, ikincisi, Ermənistanın KTMT-dən çıxması ilə bağlı açıq mövqenin ortaya qoyulması, üçüncüsü isə Xankəndidə "uğurlu" mitinq təşkil edə bilmələri idi. Paşinyan hesab edirdi ki, bütün bunlar Putinin mövqeyinə təsir etmək üçün kifayət qədər güclü şantaj vasitələridir. Gözlənilirdi ki, Putin Paşinyanın Qərbə daha çox meyl etməsinin qarşısını almaq üçün Azərbaycana təzyiq edəcək. Xankəndidə Rusiya və Ermənistanın birgə təşkil etdiyi mitinq bu mövqeyə ictimai dəstək kimi təqdim ediləcəkdi. Ancaq bunların heç biri olmadı. Ona görə ki, Azərbaycan Prezidenti əvvəlcədən məsələni birdəfəlik və konkret qoydu. Dedi ki, "Qarabağ problemi tarixə qovuşub, iki il bundan əvvəl həll edilib". Əslində bu, Azərbaycanın ikinci nidası idi. Birinci nidadan sonra nələrin baş verdiyini ermənilər heç vaxt unutmayacaqlar. İkinci nidadan sonra bənzər hadisələr bir qədər başqa formada cərəyan edə bilər. Məsələn, Qarabağda xüsusi əməliyyat keçirilər. Laçın yoluna nəzarət ələ alına bilər. O baxımdan Ermənistan rəhbərliyi Soçi fiaskosundan dərs çıxarmalı, yeni reallığı qəbul etməlidir".