Son günlər Ermənistan, ermənilər bizə o qədər “pas” veriblər ki, dünyada onları darmadağın edə biləcək azı 10 “qol” vura bilərik, amma “hücumçularımız” zəif olduğu üçün vura bilmirik:
- Ermənistan Rusiyaya sanksiyalardan yan keçməyə ən çox yardım edən ikinci ölkə oldu (Belarusdan sonra),
- ABŞ Ermənistan şirkətlərinə Rusiyaya yardım etdikləri üçün sanksiyalar qoydu,
- Ermənistan İranla strateji-hərbi sahədə yaxınlaşdı, İrandan silah, dron aldığı üzə çıxdı,
- Ermənistanda əsir düşmüş Azərbaycan əsgərinin vəhşicəsinə döyülməsi, beynəlxalq hüquqa, insanlığa yad davranışları video-görüntü ilə təsbit olundu,
- Beynəlxalq turnirdə İrəvanın ortasında, Ermənistanın rəsmi şəxslərinin iştirakı ilə olan mərasımdə gədanın biri əlini-qolunu sallayaraq səhnəyə çıxıb Azərbaycan bayrağını yandırdı.
Bir daha: Bu hələ son 10 gündə bizə verdikləri “paslardır” ki, darmadağın edilmələri üçün bəs edər, amma hələ ki, biz bu hadisələrdən istifadə edib dünyanı ayağa qaldıra biımirik, əksi olsaydı, biz bunları etsəydik, Ermənistan və dünya erməniləri indi Azərbaycana qarşı ən sərt sanksiyalara belə nail olmuşdular.
İndi deyəcəklər ki, bəs erməni lobbisi güclüdür, dünya ermənipərəstdir – boş sohbətlərdir, bəhanələrdir, işləyə bilmədiyimizi ört-basdır etmək cəhdidir, dünya mediası pula bağlıdır, Azərbaycan isə zatən o qədər mənasız işlərə pul xərcləyir, bir dəfə də mənalı işlərə xərcləsin – puldan basıb CNN, BBC, Euronews, FOX TV və s. telekanallarda ard-ardına reportajlar verdirsin, dünyaca oxunan qəzetlərdə məqalələr, şərhlər çap elətdirsinlər, o zaman görəcəksiniz ki, erməni lobbisi mifdir, pula-tanışlığa bağlı fəaliyyətdən başqa bir şey deyil.
Bizim hökumət nə PR, nə media, nə diaspora işini bilmir, bu sahələri ciddiyə almır, çünki düşüncə tərzi olaraq bu institutlara inanmırlar, özləri medianın inkişafında maraqlı deyillər, QHT sektorunu düşmən sayırlar, diaspora işinin effektliyini isə ancaq vətənə deyil də, hakimiyyətə sədaqətlə ölçürlər.
Ermənistanın, ermənilərin son günlər etdiklərinin doğru-düzgün təqdimatı hərbi qələbənin diplomatik rəsmiləşdirilməsi üçün əla fürsət yaradır...
P.S. Şəxsən mən hər gün bu tipli məlumatları müxtəlif xarici mediaya, tanıdığım siyasətçi və jurnalistlərə ötürürəm, bəhrəsini də görürəm, çox sayda insanların fikrinin, mövqeyinin dəyişdiyinin də şahidi olmuşam - sadəcə işləmək lazımdı, vəssalam.
Natig Cəfərli
Teref.az