Ermənistan Azərbaycanın ərazi bütövlüyünü tanımır və tanımırsa, sonrakı proseslərin necə cərəyan edəcəyini indidən bəlli etmək çətin deyil

Paşinyanın “Azərbaycanın ərazi bütövlüyünü tanıması” oyunbazlığı, əslində, yenidən vaxtı uzatmaq və gec partlayan mina vasitəsini işə salmaq məqsədini daşıyır. Sadəcə, bir daha diqqət edək: onun “biz Azərbaycanın ərazi bütövlüyünü tanıyırıq və siz də Ermənistanın 29.800 kv.km-lik ərazi sahəsini tanıyın” ifadəsində bir sıra biclik və riya elementləri mövcuddur. Belə ki, Paşinyan əvvəl-axır dərk etməlidir ki, uzunmüddətli münaqişədən sonra digər dövlətin, yəni Azərbaycanın ərazi bütövlüyünü tanımaq üçün yuxarıdakı ifadələr heç nəyi həll etmir. Daha dəqiq desək, bunun üçün müəyyən tələblər var. Bunu Azərbaycan Prezidenti İlham Əliyev Neftçalaya və Salyana səfəri zamanı da açıq və aydın şəkildə izah etdi ki, Ermənistanın baş naziri “Qarabağ Azərbaycandır və nida” ifadəsini işlətməlidir və bundan sonra hansısa digər müzakirələri aparmaq olar.

Ancaq biz nəyi müşahidə edirik və hansı nəticələrə gəlirik? Daha doğrusu, Nikol Paşinyan əslində, başqa amilləri də diqqətə almalı və bilməlidir ki, o öz ölkəsinin ərazisini 52 kv.km. böyütməklə münaqişədə olduğu digər ölkənin ərazisinə (86.692 kv.km) yenidən iddia irəli sürmüş olur. Hansı ki, oğurlanmış 52 kv.km. məhz həmin anklavlarımızdır – Qazağın 7 kəndi və Naxçıvanın Kərkisi!

Və bu gün Paşinyan və bütövlükdə Ermənistanın siyasi-ictimai cinahı, habelə bütün ermənilər Azərbaycanın ərazilərinə məxsus toponimləri öz dillərində və əsassız şəkildə adlandırırlar. Təbii ki, buna da son qoyulmalıdır.

Növbəti fakt: hazırda Ermənistanın dövlət qurumlarında asılmış xəritəsində Qarabağın Azərbaycanın ərazisi kimi göstərilmir və bu da o zaman baş verir ki, həmin ölkənin rəhbəri guya Azərbaycanın ərazi bütövlüyünü tanıdığını iddia edir (?!)

Bu gün Ermənistan digər ölkənin ərazisindəki separatçı-terrorçu kəsimi maliyyələşdirir, silahla təchiz edir, silahlı terrorçular göndərir, qazla təmin edir, internet verir, mobil rabitə vasitələrini ötürür və s. Bunu necə anlamaq olar? Bir tərəfdən həmin ərazilərin Azərbaycana məxsus olduğunu deməklə, başqa tərəfdən bu faktların ortada olması necə anlaşılmalıdır? Məhz bu faktlar da sübut edir ki, Ermənistanın əlində olsa, bu ölkə Qarabağın qondarma “müstəqilliyini” tanıyar, hətta özünə “birləşdirilməsi” barədə qərar da verər, təbii ki, buna cürəti çatarsa. Amma bütün bunların daha hansı ağır nəticələrə gətirib-çıxaracağı da düşmən ölkənin ağlındadır!

Amma bütün bunlara baxmayaraq, Ermənistan öz sərsəm iddialarını ortaya atmaqda davam edir. Məsələn, Laçında “KPP”-nin qoyulmasına etiraz edən İrəvan Naxçıvanla sərhəddə öz “KPP”-ni qoymalı olduğunu bəyan edir (?!) Bunu necə anlamaq olar? Təbii ki, başqa ölkənin ərazilərinə iddia kimi!

Bu da son deyil. Ermənistan Qarabağda yaşayan ermənilərə xarici pasportlar verir və bununla da bilavasitə bütün normaları ayaqlar altına alır. Üstəlik, öz milli valyutasının Qarabağda və anklav ərazilərimizdə işlədir. Bəs bunu necə adlandıraq?

Onda nəticə tələb edən sual yaranır: Paşinyan, sən müəyyən etmisənmi ki, Qarabağda yaşayan ermənilər sənin ölkənin, yoxsa Azərbaycanın vətəndaşlarıdır? Əgər onlar Ermənistanın vətəndaşlarıdırlarsa, onda Azərbaycanın ərazisində nə gəzirlər? Yox, əgər onlar Azərbaycan vətəndaşlarıdırlarsa, niyə onları öz ölkənə vizasız və s. sənədlərsiz daxil olmalarına şəraitlər yaradırsan?

Biz hələ avtomobil qeydiyyat nişanları və s. çoxsaylı və bitməyən faktları demirik. Yəni bu siyahını uzun günlərlə uzatmaq olar...

Yeri gəlmişkən, Paşinyanın Ermənistanın parlamentində səsləndirdiyi sərsəm iddialarına, daha doğrusu, Ermənistanın 29.800 kv.km-lik ərazi məsələsinə aid bəyanatına elə Ermənistandan olan ictimai-siyasi fəal, tanınmış bloger İşxan Verdyanın fikirləri ilə də yanaşmaq olar. O, sosial şəbəkədəki çıxışında bildirib ki, Paşinyanın “tezisi” əsassızdır və Ermənistan bir tərəfdən Qarabağı öz ərazisi kimi gördüyünü rəsmi qaydada bəyan etməsə də, Qarabağı Azərbaycanın tərkib hissəsi kimi də qəbul etməyib. Ona görə də 29.800 kv.km. ərazi deyərkən o riyakarlıq edir. “Paşinyanın bicliyi həm də ondadır ki, o, heç vaxt Azərbaycanın ərazi bütövlüyünü dəqiq şəkildə ifadə etməyib, hansı ki, Azərbaycanın ərazisi bütövlüyünü tanıdığını deyir”, qeyd edən Verdyan əlavə edir ki, o, bu vasitə ilə Azərbaycanın ərazi bütövlüyünü tanımır, üstəlik, Ermənistanın ərazisini 52.kv.km. artırır...

Beləliklə, məqsəd bəllidir – Ermənistan Azərbaycanın ərazi bütövlüyünü tanımır və tanımırsa, sonrakı proseslərin necə cərəyan edəcəyini indidən bəlli etmək çətin deyil.

Rövşən RƏSULOV
sia.az