Prezident İlham Əliyev Zamiq İsmayılovun Azərbaycan Xəzər Dəniz Gəmiçiliyi Qapalı Səhmdar Cəmiyyəti (QSC) sədrinin birinci müavini təyin edilməsi haqqında sərəncam imzalayıb.

Report xəbər verir ki, sərəncamla Zamiq Ömər oğlu İsmayılov Azərbaycan Xəzər Dəniz Gəmiçiliyi Qapalı Səhmdar Cəmiyyəti sədrinin birinci müavini təyin edilib.

Cəbrayıl İdris oğlu Mahmudlu Azərbaycan Xəzər Dəniz Gəmiçiliyi Qapalı Səhmdar Cəmiyyəti sədrinin müavini təyin olunub.

Qeyd edək ki, Zamiq Ömər oğlu İsmayılov 1979-cu ildə Bakı şəhərində anadan olub. 1998-ci ildə Bakı Dəniz Yolları Məktəbini texnik-gəmi sürücüsü ixtisası üzrə bitirib. 2007-2012-ci illərdə Azərbaycan Dövlət İqtisad Universitetində Kommersiya (beynəlxalq ticarət) ixtisası üzrə bakalavr, 2011-2012-ci illərdə Dünya Dənizçilik Universitetinin Gəmiçilik və liman idarəçiliyi fakültəsini bitirərək magistr ali elmi-ixtisas dərəcəsi alıb. Əmək fəaliyyətinə 1997-ci ildə Xəzərdənizneftdonanma İdarəsinin gəmilərində kapitanın köməkçisi kimi başlamışdır. 2000-ci ildən BUE Caspian Limited şirkətinin Bakı və İstanbul şəhərlərində yerləşən “Ran Shipping” və “Hilal Shippinğ” şirkətlərinin gəmilərində kapitan köməkçisi və kapitan, 2003-cü ildən Maersk Contractors Servisez şirkətində əməliyyat menecerinin köməkçisi, 2005-ci ildən BP-Group Azərbaycan şirkətində dəniz əməliyyatları üzrə qrup rəhbəri, 2013-cü ildən Kaspian Marin Servisez Limited şirkətinin Azərbaycan filialında baş əməliyyat meneceri, 2014-cü ildən isə həmin şirkətin direktoru vəzifələrində çalışıb. 2013-cü ildən London Gəmi Brokerləri İnstitutunun üzvüdür. Evlidir, 3 övladı var. Yeni Azərbaycan Partiyasının üzvüdür.

Cəbrayıl İdris oğlu Mahmudlu isə 1966-cı ildə Yardımlı rayonunun Qabağdibi kəndində anadan olub. 1990-cı ildə N.A.Voznesenski adına Leninqrad Maliyyə İnstitutunun Bakı filialını, 2004-cü ildə Azərbaycan Respublikasının Prezidenti yanında Dövlət İdarəçilik Akademiyasını bitirib. 1984-1986-cı illərdə Sovet ordusu sıralarında xidmət edib. Əmək fəaliyyətinə 1983-cü ildə Engels adına sovxozda fəhlə kimi başlayıb. 1990-cı ildən 28 May NQÇİ-də maliyyə işləri üzrə iqtisadçı, baş mühasibin müavini, baş mühasib, 1994-cü ildən Qum adası NQÇİ-də baş mühasib,1995-ci ildən DNQÇ İstehsalat Birliyində nəzarət-təftiş şöbəsinin rəisi, 1997-ci ildən Xəzərdənizneftdonanma İdarəsində iqtisadiyyat üzrə rəis müavini, 2008-ci ildən Kompleks Qazma İşləri Trestində ümumi məsələlər üzrə rəis müavini, 2014-cü ildən Azərbaycan Xəzər Dəniz Gəmiçiliyi Qapalı Səhmdar Cəmiyyətində sədrin baş müşaviri vəzifələrində çalışıb. Evlidir, 3 övladı var. Yeni Azərbaycan Partiyasının üzvüdür.