ABŞ Milli Aeronavtika və Kosmik Tədqiqatlar İdarəsi (NASA) Beynəlxalq Kosmik Stansiyada (BKS) 2030-cu ilə qədər fəaliyyətini davam etdirmək niyyətindədir. Bu barədə CNN məlumat yayıb.

Bundan sonra stansiyanın okeanın qurudan ən uzaq yeri olan Point Nemoda su altında batırılması planlaşdırılır. Telekanalın məlumatına görə, kosmik gəmi məzarlığı kimi tanınan ərazi Yeni Zelandiyanın şərq sahilindən 4828 kilometr, Antarktidadan isə 3218 kilometr şimalda yerləşir. 1971-ci ildən bəri ABŞ, Rusiya, Yaponiya və bir sıra Avropa ölkələrinin əraziyə 263-dən çox kosmik tullantı atdığı təxmin edilir.

NASA-nın hesabatından göründüyü kimi, obyektin istismardan çıxarılması 2031-ci ilin yanvarında baş verəcək.

2021-ci ilin dekabrında NASA rəhbəri Bill Nelson ABŞ prezidenti Co Baydenin BKS-nin “ömrünü” 2030-cu ilə qədər uzatmaq qərarını açıqlayıb.