ABŞ-ın hakimiyyət orqanları Kaliforniyadakı meşə yanğınlarının ilk tələfatı barədə xəbər veriblər.
"Report" xəbər verir ki, bu barədə "Los Angeles Times" məlumat yayıb.
Qeyd edilir ki, 70 yaşlı Virciniya Pesola başından aldığı zərbə, tüstüdən zəhərlənmə və yanıq xəsarəti ilə ölüb. Ştatın cənubunda təxliyyə elan edildikdə o, sükan arxasına əyləşib və yol qəzasına düşüb.
"Ölüm təxliyyə zamanı baş vermiş yol qəzası ilə bağlıdır", - deyə həkim bildirib.
Kaliforniyada dekabrın 4-dən meşə yanğınları tüğyan edir. Quru və küləkli hava alovun sürətlə yayılmasına imkan yaradır.