"Legiya"da çıxış edən millimizin üzvü Mahir Emreli bu gün sabiq klubu "Qarabağ"ın bazasında olub.

Qol.az-ın əldə etdiyi məlumata görə, o, Ağdam təmsilçisinin baş məşqçisi Qurban Qurbanovla görüşüb. Görüşün detalları hazırda bilinmir.

"Legiya" fanatlarının Ekstraklasanın 18-ci turunda "Visla"ya 0:1 hesablı məğlubiyyətdən sonra komandanın futbolçularına hücumu nəticəsində başından xəsarət alan 24 yaşlı hücumçu Polşa təmsilçisindən ayrılmaqda israrlıdır. Onunla bəzi Avropa klublarının maraqlandığı barədə xəbərlər yayılıb.

İstisna olunmur ki, millimizin üzvü bundan sonra karyerasını bu mövsümün sonuna qədər icarə əsasında "Qarabağ"da davam etdirə bilər.

Qeyd edək ki, M.Emreli iyunda "Legiya" ilə 3 illik müqavilə imzalayıb.