Ötən gün Pekin Olimpiadası ilə bağlı ingilisdilli sosial mediada ən çox adı çəkilən şəxslər yaponiyalı fiqurlu konkisürən Hanyu Yuzuru, rusiyalı fiqurlu konkisürən Kamilə Vəliyeva və yeni zelandiyalı snoubordçu Zoe Sadovski-Sinnott olub.

Bizim.Media xəbər verir ki, bunu RİA Novosti və Brand Analytics arasında Pekin Olimpiadasına həsr olunmuş birgə layihə çərçivəsində aparılan araşdırma sübut edir.

İlk 10 reytinq ingilisdilli sosial mediada gündəlik qeydlərin sayına əsaslanır. Onu qurmaq üçün 100 milyondan çox mesaj təhlil edilib.


Hanyu Yuzuru daha çox Olimpiadada iştirak etmək üçün Pekinə gəlməsi ilə əlaqədar olaraq 2957 dəfə xatırlanıb.

Kamilə Vəliyevanın adı 2423 dəfə (əsasən olimpiya oyunlarında komanda yarışının qısa proqramında qələbəsi və cəmi 15 yaşında yeni olimpiya rekordu qırması ilə bağlı) çəkilib.

Zoe Sadovski-Sinnott 2352 ilə 3-cü yeri tutub (idmançı Yeni Zelandiyanın tarixində ilk Olimpiya qızılını qazanıb).


Dördüncü yerdə Çin Prezidenti Si Szinpin (1799) qərarlaşıb.

Qeyd olunanların sayına görə, beşinci yeri yaponiyalı fiqurlu konkisürən Yuma Kagiyama (1 min 768) tutub.

Bu, əsasən, komanda turnirinin sərbəst proqramında 200-dən çox xal toplayaraq qalib olması ilə bağlıdır.


İlk 10-luğa həmçinin xizəklə tullanan sloveniyalı Urşa Boqatay (913) daxil olub.

Rusiya prezidenti Vladimir Putin də (822) oyunların açılış mərasimində iştirakına görə reytinqdə qalıb.

Siyahıya norveçli xizəkçi Teresa Yohauq (694), amerikalı fiqurlu konkisürən Natan Çen (625) və rusiyalı konkisürən Mark Kondratyuk (533) də daxil olub.


Cümə günü Pekində 24-cü Qış Olimpiya Oyunlarının açılış mərasimi olub. Onlar iki həftə - fevralın 20-dək davam edəcək. İdmançılar 109 dəst medal uğrunda mübarizə aparacaqlar.