Təfəkkür Universitetinin gömrük generalına diplom verməsi ilə bağlı qalmaqal böyüyür.

Universitetin mətbuat xidməti jam.az-a istinadla (http://jam.az/index.php?sid=10476) saytımızda dərc olunmuş məqalə barədə təkzib mətni viziual.az-a ünvanlayıb. Bildirilir ki, "General diplomu necə alıb?” sərlövhəli məqalədə universitetin ünvanına deyilənlərin heç bir əsası yoxdur, yalandır:
"Belə ki, arxiv sənədlərinə əsasən bildiririk ki, Məmmədov Nazim Xeyrulla oğlu 1994-cü ildə mərhum rektor Novruz Mustafayevin əmri ilə hüquq fakultəsinin qiyabi şöbəsinin I kursuna daxil olmuş və 1999-cu ildə həmin fakültəni bitirmişdir.
Nazim Məmmədovun oxuduğu illərdə, yəni 1995-1999-cu illərdə isə rektor vəzifəsində mərhum Mail Dəmirli olmuşdur. Məqalədə qeyd olunan Müşfiq Atakişiyevə gəldikdə isə o, Təfəkkür Universitetinin rektoru vəzifəsinə 2002-ci ildə təyin edilmişdir.
Saytınızda qeyd olunan "Təfəkkür” Universitetinin "Kiyev filialının sabiq rektoru” kimi təqdim olunan vəzifəyə gəldikdə isə bildiririk ki, "Təfəkkür” Universitetinin nə Kiyev şəhərində, nə də ki başqa şəhərlərdə filialı olub. Xahiş edirik ki. əsası olmayan məlumatları öz saytınızdan çıxarasınız”.
Hazırda xaricdə yaşayan sabiq rektor Riyad Əliyev isə jam.az-da gedən həmin məqalə ilə bağlı şərh bölümünə bunları yazıb: "Kiyevdə filialin olunmasını bu dəfə Ukrayna Təhsil Nazirliyinə məktub təqdim edəcəm, sorğu göndərib, mənim haqli olduğumun bir dəfə də şahidi olasınızı. İkinci məsələyə gələndə, Müşviq diplom alverin rəhmətliyin üstünə yıxmasın.
Mail bu generalı qəbul etməyib, yaşı uyğun olan adamları köhnə tarixlə əmrə salıb diplom verir, guya Mailin vaxtında olub. Bəs Hacı İbrahim Nehrəmliyə necə verib? Guya Hacı o vaxt oxuyub, xaric olub, sonra Müşviqin vaxtında bərpa olunub, bu fırıldaqdır. Mətbuat xidmətinin rəisi niyə ortaya əmri çıxarmır? Necə general 1-ci kursa qəbul olunub, test verib?”.
Bütün tərəflərin mövqeyini işıqlandırmağa hazırıq.
teref.az