“Dəryaz” qəzeti redaksiyasına Ağstafa rayon Elçin Mustafayev adına Yenigün kənd tam orta məktəbində korrupsiya və direktor özbaşınalığının baş alıb getdiyi barədə məlumatlar daxil olub. Qəzetin elektron poçtuna göndərilən video-görüntülər və səs yazılarından bəlli olur ki, təhsil müəssisəsinin rəhbəri Tamella Bayramova kollektivə sözün həqiqi mənasında qan uddurur.

Müəllimlər gileylənirlər ki, T.Bayamova həm müəllimlərdən, həm də texniki işçilərdən hər vəchlə rüşvət qoparmaq üçün istədiyi yola əl atır. Direktor özbaşınalığı o həddə çatıb ki, müəllimləri ən adi qüsur üstündə, çox vaxt da əsası olmayan arqumentlərlə şagirdlərin gözü qarşısındaca təhqir edir, onlara ağzına gələni deyir. Onun kobud rəftarı bir çox müəllimi xəstə salıb. Məlumatda qeyd olunur ki, son vaxtlar direktorun əsəbləşdirdiyi 3 müəllimin üstünə təcili tibbi yardım maşını çağırılıb. Hətta direktor müavini, şəhid Milli Qəhrəman İlham Həsənovun bacısı Aygün Həsənovanın direktorun təhqirinə məruz qalandan sonra ürəyi sıxılıb, dili qatlanıb.

Aygün müəllimənin həyatının həmin həyəcanları dəqiqələrinin qeydə alındığı görüntülər də redaksiyaya təqdim olunub. İnsident ondan başlayıb ki, bir neçə şagird sinif otağının pəncərəsini açaraq dərsdən qaçıbmış. Direktor buna görə haqsız yerə acığını müavinin üstünə töküb. Eynən onun kimi Rəna adlı başqa bir müəllimə də direktorun yersiz hücumundan şok yaşayıb, təcili yardıma ehtiyaclı duruma düşüb.

T.Bayramovanın məktəbdə tətbiq etdiyi despotik idarə üsulunun çox əcaib cəhətləri vardır. Təqdim olunan görüntülərdən bəlli olur ki, səhər dərsə bir neçə dəqiqə gecikən şagirdlər məktəbə buraxılmır, soyuqda-sazaqda qapı ağzında qalıb titrəyirlər. Bununla belə, direktor şagirdlərin dərsə davamiyyətinin aşağılığına görə fənn müəllimlərini tənbeh edir, “sən dərs keçmirsən, ona görə dərsinə uşaq gəlmir” deyir.

Halbuki, bəzi dərslər, hətta riyaziyyat kimi vacib fənn belə onları tədris edən fənn müəllimlərinin direktorla anlaşıb məktəbə gəlmədiklərinə görə boş keçir, uşaqlar ya sinif otaqlarında başlı-başına qalır, ya da psixoloq və ya başqa qeyri-profilli müəllimlər ixtisası düz gəlməyən dərsləri “keçirlər”. Ən əsas narazılıq da elə dərs saatlarının, xüsusilə də əvəzçilik üzrə saatların ədalətsiz bölgüsündən, direktorun həmin saatların haqqının ödənişinə yarıbayarı şərik çıxmasındandır.

Dərs vəsaitləri və ləvazimatları ilə təchizat məsələsi də problemdir. Belə ki, dövlətin ayırdığı vəsaitdən müəllim və şagirdlər faydalana bilmirlər. Adicə A4 formatlı kağız, marker tapılmır. Summativ vərəqləri verilmədiyindən, müəllimlər bundan ötrü valideynlərdən kömək istəmək məcburiyyətində qalırlar. Təxmin edilir ki, direktor ayrılan vəsaitləri məktəbə çatmadan “xırıd eləyir”, mağazalara verib satdırır, pulunu mənimsəyir. Özünün sinif rəhbəri olduğu şagirdlərin hərəsindən 8 manat yığıb şəxsi printer alıb. 40 müəllimin hərəsindən 20 manat yığaraq məktəbə aldığı səsgücləndirici qurğu da məktəbin işinə yaramır. Kabinetindən idarə etdiyi həmin qurğudan indiyədək bircə nəfər şagirdin oxuduğu şeir, nəğmə eşidilməyib. Hərçənd, direktorun kefi duranda öz mobil telefonundan qurğuya qoşub əlaqələndirdiyi, şəxsi zövqünə uyğun əcaib musiqi səsi ətrafa yayılaraq hamıya başağrı verir.

Dinlədiyimiz səs yazılarında müəllimlər bir-birinə şikayətlənirlər ki, T.Bayramova xeyir-şər üçün icazəni də onlara pulla satır, hətta əzizi ölənə də güzəştə getmir. Pul tələbini ödəməyən xidmətçi personal üzvlərini bir yolla şərləyib işdən çıaxarır, sosial durumu ağır, ailə vəziyyəti acınacaqlı olanları, azyaşlı uşağı olan başsız qadınları belə qətiyyən nəzərə almır.

Məlumatlarda qeyd olunur ki, T.Bayramova rəhbərlik etdiyi 3 ildən artıq müddət ərzində kollektivin monolit birliyini pozub, hədələdiyi müəllimlərə deyir ki, “sizin aranızdan 7-8 nəfər mənə işləyən, xəbər daşıyan həmkarınız var, nə edirsiniz, nə danışırsınız, hamısını mənə çatdırılar”. Gərginlik, despotizm o həddə çatıb ki, müəllimlərdən kimsə T.Bayramovanın ərşə çıxmış zülmünə qarşı etiraz edəndə ertəsi gün məktəbə gəldiyində həmkarları həmin şəxsə salam verməyə, kəlmə kəsməyə çəkinirlər ki, xəbərçilər bunun üstünə beşini də qoyub direktora çatdırarlar.

Bildirildiyinə görə, T.Bayramova hamını vaxtilə ali təhsil müəssisələri sırasında aşağı reputasiyaya malik olmuş San-Marino Universitetinin nəzdindəki kolleci bitirmiş, hazırda Bakıda “hüquq xidməti” göstərən qardaşı Şamil Bayramovla hədələyir.

O da bildirilir ki, T.Bayramova 8 mart – Qadınlar Günündə 40 müəllimdən hərəyə 50 manat, 5 oktyabr – Müəllimlər Günündə isə hərədən 100 manat pul yığıb. Təkcə elə bu iki tədbirdən 6000 manat mənimsəyib. Ən rüsvayçı faktlar isə ötən ilin fevralında qardaş Türkiyədə baş vermiş zəlzələdən zərər çəkənlərə yardım adı ilə toplanan 500 manatdan çox pulu və natura halında ərzaq yardımını təyinatı üzrə vaxtında çatdırmayıb sonradan mənimsəməsidir. Bir şəhid ailəsinə kömək üçün yığılan 5 manatların da aqibəti bəlli omayıb. Çünki şəhid ailəsi həmin ianəni qəbul etməkdən imtina edib, lakin direktor yığdığı pulu geri qaytarmayıb.

Redaksiyaya daxil olan məlumatları dəqiqləşdirmək üçün Regional Təhsil İdarəsinin müdiri Arslan Hacıyevıə, müavini Nizaməddin Babanlıya, Ağstafa Təhsil sektorunun müdiri Mədəd Zeynalova etdiyimiz müraciətlər də cavabsız qaldı.

Qarşı tərəfin də mövqeyini dinləməyə hazırıq.

Mövzuya qayıdacağıq.

Deryaz.az