Sərhədlərin delimitasiyası elə bir prosesdir ki, bəzi ərazilərdə geri çəkilirsən, bəzilərində irəli gedirsən.

Teleqraf.com xəbər verir ki, bunu Ermənistanın hakim partiyasının deputatı Vaqarşak Akopyan Qazaxın 4 kəndinin Azərbaycana təhvil verilib-verilməyəcəyi ilə bağlı suala cavabında deyib.

“İstənilən proses məntiqi olmalıdır. Ermənistanın razılaşdığı istənilən proses Ermənistanın maraqlarına uyğundur. Dünyada da delimitasiya prosesi müəyyən ərazilərdə irəliləyir, müəyyən ərazilərdə isə geriyə doğru gedir. Bu, təbii bir prosesdir”, - deputat bildirib.

Akopyan Ermənistanla Azərbaycan arasında delimitasiya-demarkasiya müzakirələrinin davam etdiyini da vurğulayıb.

Beləliklə, suala birbaşa cavab verməkdən çəkinən hakim partiyanın üzvü dolayı yolla kəndlərin təhvil veriləcəyini etiraf edib.